بوکو حرام کی دہشت گردی جاری

خبر رساں ادارے روئٹرز کے مطابق باگا میں داخل ہوتے ہی بوکو حرام کے شدت پسندوں نے گھروں کو نذر آتش کرنا اور فائرنگ کرنا شروع کر دی۔ ایک عینی شاہد نے بتایا ’’ جسے ہی میں نے دیکھا کہ دہشت گرد اندھا دھند فائرنگ کر رہے ہیں میں اپنے اہل خانہ کے ساتھ گاڑی میں بیٹھ کر وہاں سے فرار ہونے میں کامیاب ہو گیا۔‘‘ محمد بوکار نے روئٹرز کو مزید بتایا کہ اس دوران اس نے سڑکوں پر بچوں اور خواتین کی لاشیں بھی دیکھیں اور ان میں سے بہت سے زخمی حالت میں مدد کو پکار رہے تھے۔

بوکو حرام نے گزشتہ اختتام ہفتہ پر ہی اس علاقے پر قبضہ کیا تھا اور اس کے بعد فائرنگ اور قتل عام کا یہ دوسرا واقعہ ہے۔ بوکو حرام کے دہشت گرد جیسے ہی باگا میں داخل ہوئے سلامتی کے اداروں کے مقامی اہلکاروں نے وہاں سے فرار ہو کر ایک قریبی فوجی چھاؤنی میں پناہ لے لی۔ ضلعی انتظامیہ کے سربراہ آبا حسن نے بتایا کہ اس دوران بوکو حرام نے سو سے زائد افراد کو قتل کیا ہے۔ ایک اور عینی شاہد ابوبکر غلاما نے بتایا کہ’’ جب وہ باگا سے فرار ہو رہا تھا تو پورے علاقے سے آگ کے شعلے اٹھ رہے تھے۔‘‘

تنظیم برائے بین الاقوامی تعلقات کے مطابق گزشتہ برس بوکو حرام کی کارروائیوں میں تقریباً دس ہزار سے زائد افراد ہلاک ہوئے۔ اس تنظیم نے اپنی رپورٹ میں مزید بتایا کہ بوکو حرام نائجیریا کے لیے ایک بہت بڑا خطرہ ہے۔ ’’یہ تنظیم افریقہ کی اس سب سے بڑی معاشی طاقت کو مسلسل نقصان پہنچا رہی ہے اور صدر گڈ لک جوناتھن کے لیے ایک درد سر بن چکی ہے‘‘۔ نائجیریا میں 14 فروری کو صدارتی انتخابات منعقد ہونے جا رہے ہیں۔

روئٹرز کی جانب سے جاری کی جانے والی ویڈیو میں دیکھا جا سکتا ہے کہ باگا سے جان بچا کر بھاگنے والوں کی ایک بڑی تعداد شہر سے باہر بسوں اور دیگر سواریوں کے انتظار میں ہے۔ گزشتہ ہفتے دریائے چاڈ کے علاقے میں بوکو حرام کے اسی طرح کے حملے میں دو ہزار سے زائد نائجیرین شہری اور چاڈ کے تقریباً پانچ سو شہری اپنے جان بچا کر وہاں سے فرار ہونے میں کامیاب ہوئے تھے۔

گزشتہ برس ابوجہ حکومت کی جانب سے ملک کے تین شورش زدہ علاقوں میں ہنگامی حالت کے نفاذ کے بعد بوکو حرام کے حملوں میں نمایاں اضافہ ہوا ہے۔