ایبولا پر قابو پانے میں کئی ماہ لگ سکتے ہیں، اقوام متحدہ

نابورو کی جانب سے اس حوالے سے جاری کردہ ایک جائزہ رپورٹ میں بتایا گیا ہے کہ اقوام متحدہ اگلے برس کے آغاز تک ایبولا وائرس سے متاثرہ تمام مریضوں کو الگ کرنے کا ہدف رکھتی تھی، تاہم موجودہ صورت حال میں اس ہدف کا حصول ممکن نہیں ہے۔

ڈاکٹر نابورو نے بتایا کہ گزشتہ چار ماہ میں متاثرہ ممالک کی حکومتوں نے اس بیماری کے انسداد کے لیے موثر اقدامات کیے ہیں جب کہ متاثرہ علاقوں میں مقامی کمیونٹیز بھی اس سلسلے میں عملی کاموں میں بھرپور طریقے سے شریک ہیں۔ تاہم انہوں نے ایک مرتبہ پھر زور دیا کہ سیرالیون اور مالی میں اس وبا کو قابو میں رکھنے کے لیے زیادہ موثر اقدامات کی اشد ضرورت ہے۔

ادھر عالمی ادارہ صحت ڈبلیو ایچ او نے کہا ہے کہ یکم دسمبر تک ایبولا وائرس سے متاثرہ 70 فیصد مریضوں کو علیحدہ کرنے اور 70 فیصد ہلاک شدگان کی محفوظ طریقے سے تدفین کا ہدف حاصل نہیں کیا جا سکا ہے۔ تاہم اس ادارے کی جانب سے یہ واضح نہیں کیا گیا ہے کہ اگلے ماہ کے آغاز تک ایبولا وائرس سے متاثرہ تمام مریضوں کو الگ کر دینے کا ہدف پورا کیا جا سکتا ہے یا نہیں۔

اس سے قبل اقوام متحدہ کے سیکرٹری جنرل بان کی مون نے گزشتہ ماہ کہا تھا کہ اس بیماری کا خاتمہ اگلے برس تک ممکن نہیں ہو گا۔

جمعرات کے روز بان کی مون نے اقوام متحدہ کے مشن برائے تدارک ایبولا UNMEER کے نئے سربراہ کا تقرر کیا۔ اس مشن کی سربراہی بان کی مون نے موريتانيہ سے تعلق رکھنے والے اسماعيل اولد شيخ احمد کو سونپ دی ہے۔ قريب دو ماہ قبل تشکيل کردہ ’يو اين مشن فار ايبولا ايمرجنسی ريسپانس‘ يا (UNMEER) کی سربراہی کی ذمہ داری اب تک امريکا کے اينتھونی بينبری کے سپرد تھی۔

54 سالہ احمد اقوام متحدہ کے متعدد ذيلی اداروں ميں خدمات انجام دے چکے ہيں۔ وہ شام، يمن، نيروبی اور جارجيا ميں بھی کام کر چکے ہيں۔ اسماعيل اولد شيخ احمد ايک ايسے وقت يہ ذمہ داری سنبھال رہے ہيں، جب مغربی افريقی ممالک سے پھيلنے والی ايبولا کی وباء کے متاثرين ميں بدستور اضافہ ہو رہا ہے۔ يہ وائرس اب تک اٹھارہ ہزار سے زائد افراد کو متاثر کر چکا ہے جب کہ اس کے نتيجے ميں ہلاک ہونے والوں کی تعداد 6,400 سے تجاوز کر چکی ہے۔