امریکا گوانتانامو کے حراستی مرکز کی بندش کے لیے اقدامات کرے، وکلا

اس متنازعہ حراستی مرکز میں قید ایک یمنی قیدی کے وکیل صفائی اور امریکا کے مرکز برائے دستوری حقوق سے وابستہ عمر فرح نے کہا کہ گوانتانامو کے حراستی مرکز میں صورت حال انتہائی سنگین ہے۔ ’’ہمارے موکل وہاں مر سکتے ہیں۔ اس لیے نہیں کہ امریکا انہیں وہاں سے منتقل نہیں کر سکتا بلکہ ہماری حکومت ایسا کرنا نہیں چاہتی۔‘‘

انہوں نے اس حراستی مرکز میں بعض قیدیوں کی جانب سے جاری بھوک ہڑتال کا حوالہ دیتے ہوئے بتایا کہ وہاں ’زیادہ تر افراد‘ بھوک ہڑتال پر ہیں۔

فرح نے کہا، ’يہاں پر موجود قیدی، جیل کی بری حالت، مذہبی اشتعال انگیزی اور اس خیال سے کہ گیارہ ستمبر کے حملوں کے گیارہ برس گزر جانے کے باوجود ان کے سامنے روشنی کی کوئی موہوم سی امید بھی نہیں، پرامن انداز سے احتجاج کر رہے ہیں۔‘

واضح رہے کہ فرح اور دیگر وکلا ایک کمیشن چاہتے ہیں جو امریکی ریاستوں کی تنظیم کی ایک شاخ ہو اور جس کے پاس یہ اختیارات ہوں کہ وہ شمالی اور جنوبی امریکی ممالک کو اس حراستی مرکز کے دورے اور یہاں موجود قیدیوں سے گفتگو کا موقع فراہم کرے۔

عمر فرح نے کہا کہ صدر باراک اوباما، جنہوں نے اپنی پہلی صدارتی مہم میں اس کیمپ کی بندش کے ارادے کا اظہار کيا تھا، ان وعدوں پر عمل درآمد کی بجائے بہانے اور جواز ڈھونڈتے دکھائی دیتے ہیں۔

انہوں نے کہا کہ امریکا کو اس کیمپ کی بندش کے لیے کیے جانے والے اقدامات کے واضح شواہد اور ٹھوس اقدامات سامنے لانے چاہیں۔

واضح رہے کہ گوانتانامو میں قید متعدد قیدیوں کی منتقلی، کسی دوسرے ملک کی جانب سے قبول کرنے پر آمادگی اور امریکا میں اس حوالے سے موجود منقسم سیاسی آراء اس قیدخانے کی بندش کی راہ میں اب تک رکاوٹ تصور کیے جاتے رہے ہیں، تاہم اس قید خانے سے کچھ قیدیوں کو امریکا لے جا کر وہاں پر مقدمات بھی چلائے گئے ہیں۔

at/as (AFP)