اسپین میں ایبولا کی مریضہ اب ’بہتر‘ حالت میں

خبر رساں ادارے اے ایف پی نے طبی ذرائع کے حوالے سے بتایا ہے کہ ہسپانوی نرس ٹیریسا رومیرو کی طبیعت گزشتہ روز کے مقابلے میں ’خاصی بہتر‘ دیکھی گئی ہے۔ طبی حکام کا کہنا ہے کہ مریضہ کی حالت میں گزشتہ شب خاصی بہتری پیدا ہوئی اور اب وہ ہوش میں ہیں اور وقفے وقفے سے بات کر رہی ہیں اور ان کا مزاج بھی بہتر ہوا ہے۔

حکام کے مطابق اس مریضہ کی حالت ’تشویش ناک‘ ہے مگر اس میں ’بہتری‘ آ رہی ہے۔

میڈرڈ میں اس مریضہ کا علاج کرنے والے ڈاکٹروں نے رومیرو پر تجرباتی دوا زیڈ ماپ جمعے کی شب آزمائی۔

واضح رہے کہ ایبولا کی بیماری کا مکمل علاج موجود نہیں ہے اور زیڈ ماپ ان چند ادویات میں سے ایک ہے، جن کے بارے میں کہا جاتا ہے کہ یہ ادویات ممکنہ طور پر کسی مریض کو اس بیماری سے باہر آنے میں خاصی معاون ثابت ہو سکتی ہیں۔

یہ بات اہم ہے کہ رومیرو میں اس وائرس کی تصدیق چھ اکتوبر کوئی ہوئی تھیں۔ مغربی افریقہ سے باہر کسی شخص میں اس وائرس کی تشخیص کا یہ پہلا واقعہ تھا۔ان کے بارے میں کہا جا رہا ہے کہ وہ مغربی افریقہ میں اس وائرس کا شکار ہوئیں تھیں۔

دوسری جانب برطانیہ نے ہفتے کے روز ملک میں بھر ایبولا وائرس کے خلاف اپنے انتظامات کا جائزہ لیا۔

آٹھ گھنٹوں پر محیط اس تیاری کے دوران ہے، اداکاروں نے ایبولا کی بیماری میں مبتلا ہونے کی اداکاری کی، جب کہ ڈاکٹروں، نرسز اور ایمبولنس سروس کی چستی، دستیابی اور ایسے کسی واقعے سے نمٹنے کی صلاحیت کا جائزہ لیا گیا۔

برطانوی وزارت صحت کی جانب سے جاری کردہ بیان میں بتایا گیا ہے کہ اس آزمائش میں ہنگامی حالت سے نمٹنے والی حکومتی کمیٹی کوبرا کے اجلاس کا فوری انعقاد بھی شامل تھا۔

بیان میں برطانوی عوام کو یقین دہانی کرائی گئی ہے کہ ایبولا وائرس کے کسی کیس کی صورت میں برطانیہ مکمل طور پر تیار ہے۔ بیان میں مزید کہا گیا ہے کہ اس آزمائش کے ذریعے یہ دیکھنے کی کوشش کی گئی ہے کہ اگر ایسا کوئی واقعہ سامنے آتا ہے، تو اس سے نمٹنے کی صلاحیت کس قدر موجود ہے اور بہتری کی گنجائش کہاں کہاں ہو سکتی ہے۔

اس سے قبل اقوام متحدہ کے ادارہ برائے صحت کی جانب سے کہا گیا ہے کہ مغربی افریقہ میں اس بیماری کی وجہ سے ہلاکتوں کی تعداد چار ہزار سے تجاوز کر چکی ہے۔ اقوام متحدہ کا کہنا ہے کہ اس متعدی وبا کے خاتمے کے لیے بین الاقوامی برادری کی جانب سے مہیاکردہ سرمایہ ناکافی ہے۔