احتجاجی لانگ مارچ ابھی بھی اسلام آباد کی طرف گامزن

اسلام آباد سے اس مراسلے کی وصولی تک تحریک انصاف کے سربراہ عمران خان کی قیادت میں ’آزادی مارچ‘ لاہور سے براستہ جی ٹی روڈ گجرات پہنچ گیا تھا جبکہ پاکستان عوامی تحریک کے سر براہ طاہر القادری کی قیادت میں ’انقلاب مارچ‘ کے شرکاء کی رفتار نسبتاﹰ تیز تھی اور تب تک وہ اسلام آباد کےقریب روات پہنچ چکے تھے۔

جمعے کے روز جب تحریک انصاف کا قافلہ دن کے وقت گوجرانوالہ پہنچا تو وہاں مبینہ طور پر مسلم لیگ (ن) کے کارکنوں نے اس کنٹینر پر پتھراؤ کیا جس پر عمران خان سوار تھے۔ مسلم لیگ (ن) اور تحریک انصاف دونوں کی قیادت نے اس پتھراؤ میں اپنے کارکنوں کے زخمی ہونے کے دعوے کیے ہیں۔ تاہم اس واقعے کے بعد عمران خان کنٹینر سے اتر کر ایک بلٹ پروف گاڑی میں سوار ہو گئے۔

وزیر اعلیٰ پنجاب شہباز شریف نے اس واقعے کا نوٹس لیتے ہوئے انکوائری کا حکم دے دیا ہے۔ پاکستان پیپلز پارٹی، جماعت اسلامی، عوامی تحریک اور ایم کیو ایم سمیت دیگر سیاسی جماعتوں کی قیادت نے عمران خان کے کنٹینر پر پتھراؤ کی مذمت کی ہے۔

اسی دوران اسلام آباد میں مقامی انتظامیہ کے حکم پر مخلتف شاہراہوں سے کنٹینرز ہٹائے جانے کے بعد گزشتہ روز سے خیبر پختوانخوا اور چند دیگر علاقوں سے تحریک انصاف کے کئی قافلے اسلام آباد پہنچ رہے ہیں۔ تحریک انصاف کے ان کارکنوں میں بڑی تعداد نوجوانوں کی ہے جبکہ خواتین بھی ان قافلوں میں شامل ہیں۔

صوبہ خیبر پختونخوا کے وزیر اعلیٰ بھی ایک قافلے کی قیادت کرتے ہوئے گزشتہ رات اسلام آباد پہنچے تھے۔ صحافیوں سے بات چیت کرتے ہوئے انہوں نے کہا، ’’سارے عوام عمران خان کے ساتھ کھڑے ہیں اور انشاء اللہ تعالی جب عمران خان پہنچیں گے، تو مھجے یقین ہے کہ یہاں پیدل پھرنے کی جگہ بھی نہیں رہے گی۔ اتنے لوگ آ رہے ہیں۔ سارا پاکستان آرہا ہے۔‘‘

گزشتہ روز وفاقی دارالحکومت پہنچنے والے تحریک انصاف کے کارکنوں کی بڑی تعداد نے رات کھلے آسمان تلے گزاری۔ جمعے کی شام اسلام آباد میں ہونے والی بارش نے ان کی مشکلات میں مزید اضافہ کر دیا۔ تاہم مشکلات کے باوجود یہ کارکن پر عزم تھے اور ان کا کہنا تھا کہ جب تک عمران خان کہیں گے، وہ اسلام آباد میں ہی ٹھہریں گے۔

قبل ازیں آج جمعے کے روز پاکستانی سپریم کورٹ نے ملک میں کسی ماورائے آئین اقدام کو روکنے سے متعلق ایک درخواست پر اپنے عبوری فیصلے میں کہا کہ تمام ریاستی ادارے اور اہلکار کسی بھی ماورائے آئین اقدام سے باز رہیں۔ عبوری حکم میں کہا گیا ہے کہ ریاستی ادارے اور اہلکار اپنی ذمہ داریاں آئین اور قانون کے دائرے میں رہتے ہوئے ادا کریں۔ چیف جسٹس ناصر الملک کی سر براہی میں اس درخواست کی سماعت ایک چار رکنی بنچ نے کی۔

پاکستان سپریم کورٹ بار ایسوسی ایشن کے صدر کامران مرتضیٰ کی جانب سے دائر کی گئی اس درخواست میں موقف اختیار کیا گیا تھا کہ ملک کی موجودہ صورت حال میں شہریوں کے بنیادی انسانی حقوق پامال نہ کیے جائیں اور عدالت کسی بھی مجاز اتھارٹی یا ریاستی ادارے کی طرف سے ممکنہ ماورائے آئین اقدام کو روکے۔ عدالت نے اس مقدمے میں فریق وفاقی حکومت کو نوٹس جاری کرتے ہوئے مزید سماعت اٹھارہ اگست تک کے لیے ملتوی کر دی۔

دریں اثناء اسلام آباد کی انتظامیہ نے تحریک انصاف کے بعد آج پاکستان عوامی تحریک کو بھی اسلام آباد میں جلسہ کرنے کی اجازت دے دی ہے۔ یاد رہے کہ عمران خان کو اسلام آباد کے آبپارہ چوک میں جبکہ طاہر القادری کو زیرو پوائنٹ پر جلسے کے لیے سٹیج بنانے کی اجازت دی گئی ہے۔