Kirchliche Hochschule
2 Prill 2011Në shkollat e larta fetare të kishës protestante përgatiten priftëresha dhe priftërinj, si dhe mësues për lëndën e fesë. Edhe muzikë kishtare mësohet në shkollat e larta të financuara nga kisha protestante. Përveç kësaj shkollat e larta protestante ofrojnë degë studimi në shkenca shoqërore dhe në pedagogji fetare. Gjithashtu degët për të ashtuquajturat "profesione shëndetësore" si përgatitja për mami, ergoterapia dhe për kujdesja për personat e moshuar zgjerohen gjithnjë e më shumë.
Përgatitja e priftërinjve
Përgatitja e priftërinjve të kishës katolike zhvillohet gjithashtu në fakultetet teologjike përkatëse. Disa urdhëra të besimit katolik si jezuitët, kapuçinët, apo urdhëri i Don Boscos e përgatisin vetë brezin e ri në shkollat e tyre. Në Sankt Augustin në landin e Renanisë Veriore-Vestfalisë ndodhet i vetmi kolegj filozofik dhe teologjik i kishës katolike, që e vë theksin në teologjinë misionare.
Shkollat e larta katolike
Kisha katolike është gjithashu financuese e shkollave të larta, që përgatisin punonjës socialë si dhe punonjës të ardhshëm në profesionet e pedagogjisë fetare dhe të edukimit të komunitetit. Numri i të interesuarve për studim në një shkollë të lartë katolike është çdo vit më i lartë se vendet e studimit në dispozicion. Prandaj këto shkolla të larta kanë procedurat e veta të përzgjedhjes, për shembull përmes zhvillimit të intervistave.
I hapur për studentë të të gjitha besimeve
Diçka e veçantë në arsimin e lartë gjerman është shkolla e lartë për studime hebraike në Heidelberg, që financohet nga qendra akademike e bashkësive hebreje në Gjermani. Ky universitet është i hapur për studentë të të gjitha besimeve.
Autor: Claudia Unseld/ Angelina Verbica
Redakoi: Aida Cama