Nasarar yaki da Ebola

Hukumar ta Majalisar Dinkin Duniya ta sanar da cewa a karon farko tun cikin watan Yuni, a makon da ya gabata an samu raguwar wadanda ke kamuwa da cutar a kasashe uku da cutar tafi kamari a cikinsu wato Guinea da Saliyo da kuma Laberiya. Hukumar ta kara da cewa kaso 30 cikin 100 na wadanda suka kamu da cutar a Guinea da kuma kaso 50 cikin 100 a Laberiya ne kadai aka hakikance sun yi mu'amala da masu cutar ta Ebola, wanda hakan ya sanya tunanin a kan yadda mutane ke kamuwa da ita. Cutar dai kawo yanzu ta hallaka sama da mutane 8,000 tun bayan da ta bulla a yankin yammacin Afirka cikin farkon shekara ta 2014 da ta gabata.

MAwallafiya: Lateefa Mustapha Ja'afar
Edita: Umaru Aliyu