Polonia dhe shenjtërimi i Papa Gjon Palit të Dytë
25 Prill 2014Numërimi mbrapsht ka filluar. Në Krakovë, atje ku Papa nga Polonia ka studiuar dhe shërbyer si peshkop, është vendosur një orë, që tregon orët e mbetura deri në shenjtërimin e tij. Në kopshtin e ndërtesës në Krakovë, ku Papa Gjon Pali i Dytë qendornte kur vizitonte vendin e tij, kanë vendosur një automat. Aty mund të blihen monedha të stampuara me fytyrën e Papës. Përgatitjet për festimet e mëdha vazhdojnë. E gjithë Polonia është e përfshirë nga përgatitjet: mesha fetare solemne, lutje gjatë natës, koncerte dhe ekspozitat do t'i japin shkëlqim ditës speciale
I Shenjti At i Shenjtë
"Për ne, ky është një përjetim i madh. Më parë i thoshja atij Peshkop, më pas Kardinal, më pas Ati i Shënjtë, ndërsa më vonë I Shenjti At i Shenjtë“, tha në një konfernecë për shtyp sekretari dhe miku i Papa Gjon Palit të Dytë, Stanislaw Dziwisz, i cili sot është Kardinali i Krakovës. Më pas ai theksoi: "Shenjtërimi i Papës është një moment i rëndësishëm për të gjithë katolikët."
Ne mediat polake nuk dëgjohet pothuasje asnjë zë kritik. Polakët janë krenarë. "Ai është bashkëatdhetari ynë dhe kjo na bën të lumtur. Kur Papa dilte në televizor e shihja dhe dëgjoja gjithmonë. Kam qenë i pranishëm gjithmonë edhe në vizitat që bënte në Poloni", thotë një burrë i vjetër, i cili sapo kishte blerë një biografi të Papës në një librari.
Një njeri i ngrohtë dhe normal
Përveç meshave fetare, qytetet e mëdha kanë përgatitur aktivitet të veçanta për 27 prillin. Në Posen, për nder të Papës, do të mbajë një koncert ylli i operas, Placido Domingo. Disa pjesë muzikore janë kompozuar në bazë të poezive të Papës. Në Breslau në tramvje dhe disa ndërtesa, si përshembull ajo e Universitetit dhe Bashkisë, janë vendosur citate nga Papa Gjon Pali i Dytë. Në muret e Pallatit Arqipeshkvor në Krakovë do të shfaqet një show-3D. Pamjet që do të shfaqen janë nga takimet e Papës me të rinjtë, të cilët ai i kishte përzemër.
Edhe roli i Papa Gjon Palit të Dytë në historinë e Polonisë është një temë e rëndësishme. Në Varshavë ekspozita e titulliar „Papa i Lirisë“ dokumenton ndikimin e tij në krijimin e shoqatës „Solidarność“ dhe në rënien e regjimit komunist. „Kuptimi i tij për vendin tonë dhe për të gjithë botën është tepër i çmuar, por ai ishte një njeri i ngrohtë dhe normal", komenton një vizitor i ekspozitës.
Rizbulimi i Papës
Për Peshkopin Jan Zając, i cili njihte personalisht Papën, shenjtërimi nuk është një surprizë. „Nuk kisha asnjë dyshim që ai ishte një njeri i shenjtë. Ai ishte i lidhur më Zotin, por gjithashtu gjithnjë i hapur me njerëzit. Kjo është e shenjtë.“ Natyrisht asnjë nuk priste, që shenjtërimi të ndodhte me kaq vonesë.
Kardinali Dziwisz thekson kuptimin e shenjtërimit. Sipas tij shenjtërimi, është një mundësi për të gjithë polakët për të rizbuluar Papën. „Zoti na jep Pofetët, të cilët na tregojnë të ardhmen. Për ne është e rëndësishme të njohim trashëgiminë dhe të nxjerrim mësimet e duhura“, thotë ai.
Papa Gjon Pali i Dytë do të shenjtërohet më 27 prill në Romë në një meshë të veçantë të mbajtur nga Papa Françesku. Më pas ai do të jetë polaku i 31-të i shenjtëruar nga Kisha Katolike.