1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Bota

Plani egjiptian i paqes: Tërhiq e mos e këput

Ndërkohë që luftimet vazhdojnë në Gazë, ndërmjetësuesit në arenën diplomatike po nxitojnë për të mundësuar vendosjen e paqes në rajon. Edhe egjiptianët janë të angazhuar në një plan paqeje.

Presidenti egjiptian Mubarak duke biseduar për gjendjen në Rripin e Gazës me Ministrin e Jashtëm gjerman, Steinmeier në Kairo, janar 2009

Armëpushim apo tërheqje? Kjo është pyetja që shtrohet aktualisht. Plani i paqes i Egjiptit parashikon fillimisht një armëpushim të kufizuar dhe bisedime, të cilat do t'i jepnin fund kontrabandës së armëve, do të hapeshin pikat kalimtare të kufirit - si dhe një tërheqje të trupave izraelite. Diplomatët perëndimorë, së fundi edhe ministri i jashtëm gjerman, Frank Walter-Steinmeier dhe ish-kryeministri britanik, Tony Blair, e mbështetën këtë plan.

Nga pala arabe ai do të shihej me sy kritik, thotë politolologu egjiptian Hasan Nafa: “Kërkesat e së ashtuquajturës “iniciativa egjiptiane” pasqyrojnë në të vërtetë kërkesat e Izraelit përsëri. Ato mund të përmbushen vetëm në qoftë se ka një fitore të qartë ushtarake. Çështja thelbësore e “iniciativës” është përpjekja për të arritur një rezultat pa veprime luftarake”.

Udhëheqësi i Hamasit, Ismail Hanija

Hamasi ka rezerva për planin e paqes

Pika më kritike e Hamasit është kërkesa për një armëpushim deri në 15 vjet, pa tërheqjen e menjëhershme të ushtrisë izraelite. Por një prezencë e pushtuesve në Rripin e Gazës është e papranueshme, u tha ditën e martë. Po ashtu vëzhguesit ndërkombëtarë të kufirit i kundërshtuan islamistët. Në Kairo, në të njëjtën kohë ishin për bisedime përfaqësues të Hamasit nga Siria dhe nga Rripi i Gazës. Edhe Musa Abu Marsuk-u, numri dy i byrosë politike të Hamasit që jeton në Damask, ishte i pranishëm në këto bisedime: "Ne kemi pa dyshim rezerva dhe dëshirë për ta ndryshuar planin e paqes të Egjiptit. Në qoftë se këto dëshira merren parasysh, mund të krijohet një paketë që mund të çojë në një zgjidhje. Këtë "iniciativë" në formën e saj aktuale ne nuk e pranojmë".

Mubarak kërkon mbështetje për planin e paqes

Megjithatë, egjiptianët këmbëngulin hapur që të qëndrojnë tek versioni i deritanishëm. Dhe me këtë qëndrim u bë e qartë që Kairoja është kundër një takimi të posaçëm të Ligës Arabe, që është caktuar të mbahet javën e ardhshme më 16 janar në Katar, për të rishikuar edhe njëherë planin e paqes. Presidenti i Egjiptit, Mubarak të martën pasdite ka udhëtuar së bashku me shefin e tij të shërbimit sekret për në Arabinë Saudite, për t'u konsultuar me mbretin Abdullah. Supozohet që ai ka shkuar për të kërkuar mbështetje për planin e tij të paqes dhe përkrahje kundër organizimit të takimit arab.

Ndërkohë lufta vazhdon. Shtëpi e shkatërruar në Gazë, 14 janar 2009

Hasan Nafa, politologu egjiptian e vlerëson qëndrimin egjiptian, si kapitullim përballë Izraelit. "Izraeli po përpiqet që të gjitha palëve arabe dhe jo arabe t'u diktojë vendimet e tij. Pikërisht këtë Egjipti e ka kuptuar, por nga ana tjetër ai e ka kuptuar po ashtu që nuk mund t'i ndihmojë palestinezët.“ Strategjia e Egjiptit është të zhvillojë bisedime me të dyja palët dhe të ofrojë shpresa që kjo strategji të jetë e suksesshme. Këtë e bëri të ditur edhe këshilltari i ministrit izraelit të mbrojtjes, Amos Gilad, i cili do të jetë të mërkurën i pranishëm në raundin e dytë të bisedimeve në Kajro.

Kontakt

Kontakt

Deutsche Welle
Albanische Redaktion
Kurt-Schumacher-Str. 3
D -53110 Bonn
Deutschland

Telefon:  +49 228 429-4685
Telefaks: +49 228 429-4690

E-mail:  shqip@dw.de

http://www.dw.de/albanian