"Diversiteti seksual" në mësim

Në vitin 2015 në landin Baden-Württemberg hyn në futi një plan i ri mësimor që shërben si bazë për kurrikulat e lëndëve. Edhe pse këto plane nuk janë shpallur ende zyrtarisht, thuhet se sipas planit të ri parashikohet që në mësim të trajtohet si pjesë e detyrueshme edhe tema e "diversitetit seksual".

Mësuesi i një shkolle të mesme në Schwarzwald ka formuluar një peticion kundër trajtimit të kësaj temë në mësim. Peticioni i tij në internet, ku ai shpreh pakënaqësinë që tema e diversitetit seksual të përfshihet në mësim, ka deri tani më shumë se 100.000 mbështetës. Sipas peticionit planet e reja kanë si qëllim "një riedukim pedagogjik, moral dhe ideologjik" nëpër shkolla.

Mësuesi u detyrua ta ndryshonte versionin e parë të peticionit, sepse ai përmbante formulime që shkelin kushtet e përdorimit të portalit online. Fjala ishte për disa pasazhe që përmbanin formulime drastike diskriminuese. Edhe pse versioni i tanishëm tingëllon shpesh jo i qartë dhe i ndërlikuar, në parim ai drejtohet kundër LSBTTIQ-ve. LSBTTIQ do të thotë lesbike, homoseksualë, biseksualë, transseksualë, transgjinorë (transgender), interseksualë dhe queer. Në peticion thuhet se plani i ri mësimor që parashikon trajtimin e temës së diversitetit seksual, nuk parashikon trajtimin e "fenomeneve dhe efekteve negative që shoqërojnë stilin e jetës së LSBTTIQ-ve", si p.sh. vetëvrasjet, drogat, HIV/SIDEN dhe sëmundjet psiqike.

Në të njëjtën kohë në peticion deklarohet edhe se: "Ne i mbështesim përpjekjet për të mos i diskriminuar homoseksualët, biseksualët, transeksualët dhe interseksualët dhe se në mësim duhet të trajtohet pikërisht ky diskriminim që ekziston." Kjo fjali u shtua në një versionin e dytë të peticionit.

Ndezja e debatit për planin mësimor në landin Baden-Württemberg lidhet edhe me deklaratat publike të ish-futbollistit Thomas Hitzlsperger se është homoseksual.

Prej vitesh jo temë tabu

Planet e reja mësimore për landin Baden-Württemberg që në mësim të trajtohet edhe tema e diversitetit seksual nuk janë ndonjë risi. Karla Etschberg, profesore e pedagogjisë, thotë se Berlini dhe landi Brandenburg janë pionierë absolute në trajtimin e kësaj teme dhe se edhe në landin Nordrhein-Westfalen ka prej vitesh një projekt që financohet nga qeveria e landit dhe që ka në fokus trajtimin e diversitetit seksual për nxësit e shkollave.

Etschberg mendon se trajtimi dhe tema e pranimit të diversitetit seksual nuk duhet të jetë aq pjesë e lëndës "Njohuri për seksualitetin" por më tepër pjesë e lëndësh "Edukimi shoqëror" dhe të trajtohet si pjesë e diskutimeve mbi vlerat themelore shoqërore. Edhe plani i ri shkollor në Baden-Württemberg synon ta trajtojë diversitetin seksual si temë në disa lëndë.

Nevoja e kualifikimit të mësuesve

Doro Moritz, kryetare e Sindikatës së Arsimit dhe të Shkencës në Baden-Württemberg mendon se për trajtimin e diversitetit seksual si temë mësimore janë të nevojshme trajnimime për mësimdhënësit dhe kulifikimi i mësuesve qe e trajtojnë këtë temë në mësim.

Moritz i konsideron përpjekjet e tanishe për reformimin e planit mësimor urgjentisht të nevojshme: "Deri tani ajo temë mund të trajtohej në mësim vetëm vullnetarisht dhe meqeë edhe për mësuesit kjo nuk është një temë e lehtë për t'u trajtuar ajo ose nuk trajtohej ose trajtohej fare pak."

Megjithë peticionin qeveria e landit Baden-Württemberg nuk ka ndër mend të ndryshojë planet e saj për përfshirjen në mësim të temës së diversitetit seksual. Ndërkohë në internet gjendet edhe një peticion pro trajtimit të diversitetit seksual në orën e mësimit.