Iran ta ce yakar Siriya ya sabawa doka

Mr. Zarif ya bayyana hakan ne a wannan Lahadin yayin wata ziyara da ya ke a birnin Bagadazan kasar Iraki wadda ita ce irinta ta farko tun bayan da aka girka sabuwar gwamnati a kasar.

Wadannan kalamai da ministan na harkokin wajen na Iran ya yi dai na zuwa ne dadai lokacin da sakataren wajen Amurka John Kerry ke cigaba da yin taruka da zummar zawarcin kasashen duniya na bada goyon bayansu dangane da yakar Siriyan saboda tabbacin da Kerry din ya ce suna da shi cewar Assad ne ke da hannu wajen amfani da makamai masu guba a yakin kasar ta Iran.

Kasar Iran dai ita ce babbar aminiyar Siriya a yankin gabas ta tsakiya kuma ta sha nuna rashin amincewarta da afkawa gwamnatin Assad da yaki.

Mawallafi: Ahmed Salisu
Edita: Usman Shehu Usman