1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Habari za Ulimwengu

Taarifa ya Habari za Ulimwengu kutoka Idhaa ya Kiswahili ya DW

Habari | 24.04.2014 | 15:45

Majeshi ya Ukraine yapambana na waasi

Wanajeshi wa Ukraine wamewauwa karibu waasi watano wanaoiunga mkono Urusi wakati wakipambana na ngome za wanamgambo wanaopigania kujitenga mashariki mwa nchi hiyo. Wizara ya mambo ya ndani imesema polisi wakisaidiwa na jeshi la Ukraine wameondoa vituo vitatu vya ukaguzi vilivyosimamiwa na makundi yenye silaha katika mji wa Slaviansk. Wizara ya Ulinzi ya Urusi imesema imeanza kufanya mazoezi ya kijeshi karibu na mpaka wa Ukraine, ambako imepeleka maelfu ya wanajeshi wake, kama hatua ya kulijibu jeshi la Ukraine pamoja na mazoezi yanayofanywa na Jumuiya ya Kujihami ya NATO mashariki mwa Ulaya. Sergei Lavrov ni Waziri wa Mambo ya Nchi za Kigeni wa Urusi

Rais wa Marekani Barack Obama ameishutumu Urusi kwa kushindwa kuheshimu makubaliano ya kutuliza mzozo huku akitishia kuiwekea vikwazo vipya.

Marekani na Japan kuimarisha ushirikiano

Rais wa Marekani Barack Obama na Waziri Mkuu wa Japan Shinzo Abe wamekubaliana kuimarisha ushirikiano wa ulinzi wakati kukiwa na wasiwasi kuhusu kujipanga jeshi la China na mipango ya nyuklia na makombora ya Korea Kaskazini. Obama amemwambia Abe katika mkutano wa kilele mjini Tokyo kuwa muungano wa Marekani na Japan ni msingi siyo tu kwa usalama wa nchi hizo mbili katika eneo la Asia Pasifik lakini pia kwa kanda nzima. Obama amesema visiwa vya Senkaku vinavyosimamiwa na Japan, lakini ambavyo pia vinagombaniwa na China na Taiwan, viko chini ya ushirikiano wa ulinzi kati ya Marekani na Japan. Obama na Abe pia wamesema wanajaribu kukamilisha mashauriano kuhusu mkataba wa biashara katika ukanda ya Pasifiki.

Lieberman:Amani Mashariki ya Kati ni ngumu

Waziri wa Mambo ya Nchi za Kigeni wa Israel amesema muafaka mpya wa maridhiano kati ya pande mbili hasimu za Palestina umeondoa kabisa uwezekano wa kupatikana mkataba wa amani. Matamshi hayo ya waziri Avigdor Lieberman yamejiri wakati Baraza la Usalama wa Kitaifa la Israel likiandaa kikao cha dharura kushauriana namna ya kuijibu hatua hiyo. Makundi pinzani ya Kipalestina, Hamas na Fatah, yalitangaza jana muafaka wa kuunda serikali ya umoja wa kitaifa, kwa lengo la kumaliza mzozo uliodumu miaka saba ambao umewagawa Wapalestina kuongozwa na serikali tofauti katika Ukingo wa Magharibi na Ukanda wa Gaza. Tangazo hilo liliikasirisha Israel, ambayo inalichukulia Hamas kuwa kundi la kigaidi, na likatishia mazungumzo ya amani yanayosimamiwa na Marekani ambayo muda wake wa mwisho ni Aprili 29.

Waasi wa Sudan Kusini wasonga mbele

Waasi nchini Sudan Kusini wamesema kuwa wanakaribia kutwaa visima muhimu vya mafuta pamoja na miji mikuu ya majimbo mawili, hali inayoashiria kuanguka kwa serikali na kutokea umwagikaji mkubwa wa damu. Taarifa kutoka kwa msemaji wa waasi, Jenerali Lul Ruai Koang, imesema majeshi yanayopambana na Rais Salva Kiir wamechukua mji wa Renk, karibu na mpaka wa Sudan, na wanakaribia kuchukua visima vya mafuta vya Paloich. Amesema kuanguka kwa mji wa Renk kumewanasa wanajashi wa serikali mjini Malakal na sasa hawana njia za kusafirisha vifaa au kutoroka. Wakati huo huo, Baraza la Usalama la Umoja wa Mataifa linatafakari kuyawekea vikwazo makundi yanayopigana nchini Sudan Kusini, baada ya kiongozi wa operesheni za kulinda amani Herve Ladsous kusema kuwa lazima hatua kali zichukuliwe ili kumaliza machafuko.

Wamarekani watatu wauawa kwa risasi Kabul

Afisa wa polisi nchini Afghanistan amewafyatulia risasi wafanyakazi katika hospitali moja inayosimamiwa na shirika moja la misaada la Marekani mjini Kabul, na kuwauwa Wamarekani watatu. Hilo ndilo shambulio la karibuni zaidi linalowalenga raia wa kigeni mjini Kabul. Mtu huyo alijeruhiwa katika tukio hilo lililotokea nje ya hospitali ya shirika la kimataifa la CURE, na akakamatwa na polisi. Lengo la shambulizi hilo bado halijabainika. Mapema mwezi huu, mpiga picha Mjerumani wa shirika la AP Anja Niedringhaus aliuawa kwa kupigwa risasi na kamanda mmoja wa polisi katika mkoa wa Mashariki wa Khost. Mwenzake raia wa Canada alijeruhiwa vibaya katika shambulizi hilo.

William Burns aahidi msaada zaidi nchini Libya

Naibu Waziri wa Mambo ya Nchi za Kigeni wa Marekani William Burns leo ameiahidi Libya msaada zaidi kutoka Marekani ili kusaidia kupambana na machafuko yanayosababishwa na wanamgambo wenye itikadi kali za kiislamu. Burns amesema nchi hiyo haiwezi kupata uthabiti wa kisiasa na kiuchumi bila kupambana na changamoto zake za usalama. Burns ndiye afisa wa ngazi ya juu kabisa kutoka Marekani kuzuru Libya tangu kufanyika shambulizi katika ubalozi wake mdogo wa mji wa mashariki ya Libya, Benghazi, mwezi Seotemba mwaka wa 2012. Balozi wa Marekani, Chris Stevens, na Wamarekani wengine watatu waliuawa katika shambulizi hilo lililofanywa na wanamgambo wenye itikadi kali za Kiislamu.

Mamia ya waasi wa M23 wamekwama Uganda

Kiongozi wa kiraia wa kundi la waasi wa Kongo la M23 amesema mamia ya waasi hao wamekwama nchini Uganda wakati wakisubiri thibitisho la kupewa msamaha na serikali ya Jamhuri ya Kidemokrasia ya Kongo. Rene Abandi amesema kuwa anataraji Kongo itaitanua orodha ya waasi wanaozingatiwa kupewa msamaha, ikiwa ni mojawapo ya masuala yaliyozusha mvutano baina ya pande zote mbili kabla ya kusaini mkataba wa amani mwishoni mwaka jana. Zaidi ya waasi 600 wa M23, akiwemo kamanda Sultani Makenga, walitorokea nchini Uganda mwaka uliopita baada ya kukabiliwa na shinikizo kutoka kwa wanajeshi wa Kongo na Umoja wa Mataifa.

Kumbukumbu ya janga la Bangladesh yafanyika

Maelfu ya Wabangladesh wamefanya maandamano ikiwa ni kumbukumbu ya mwaka mmoja tangu kutokea mkasa mbaya zaidi wa kiwanda cha nguo. Waathiriwa waliojawa na hasira, walifanya maandamano katika eneo kulikokuwa jengo la kiwanda cha nguo la Rana Plaza, ambalo liliporomoka Aprili 24 mwaka jana na kusababisha vifo vya watu 1,138. Waathiriwa hao wakiwa wamebeba maua, wamedai kulipwa fidia. Karibu watu 2,000 walijeruhiwa katika ajali hiyo mbaya zaidi, ambayo ilidhihirisha viwango duni vya usalama pamoja na mazingira duni ya utendaji kazi katika nchi hiyo ambayo ndiyo ya pili kubwa duniani kwa utengenezaji nguo.

Mkuu wa Formula One afikishwa mahakamani

Mkuu wa mashindano ya magari ya Formula One Bernie Ecclestone amefikishwa leo katika mahakama moja mjini Munich, akikabiliwa na kesi ya hongo ambayo huenda ikatishia uhalali wake katika mchezo huo. Ecclestone mwenye umri wa miaka 83 anakanusha tuhuma za rushwa na uchochezi kwa uvunjaji wa uaminifu, na anaweza kuhukumiwa kifungo cha hadi miaka 10 jela kama atapatikana na hatia. Mashitaka dhidi ya Muingereza huyo yanahusisha malipo ya dola milioni 44 kwa mtalaamu wa benki Gerhard Gribkowsky, anayetumikia kifungo cha miaka minane na nusu jela kwa kupokea pesa hizo. Waendesha mashitaka wanadai malipo hayo yalinuia kuwezesha mauzo ya hisa za benki moja ya mjini Munich, Bayern LB katika mchezo wa Formula One, kwa muuzaji aliyechaguliwa na Ecclestone.