1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Habari za Ulimwengu

Taarifa ya Habari za Ulimwengu kutoka Idhaa ya Kiswahili ya DW

Habari | 23.07.2014 | 15:10

Mashambulizi yaendelea katika Ukanda wa Gaza

Shambulizi la kutokea angani lililofanywa leo na jeshi la Israel kaskazini mwa Ukanda wa Gaza limewauwa watu watano, wakati mgogoro uliodumu wiki mbili sasa kati ya Israel na wanamgambo wa Hamas ukiendelea kupamba moto.  Shambulizi hilo limefikisha 30 idadi ya Wapalestina waliouawa leo pekee. Jumla ya Wapalestina 660 wameuawa tangu mashambulizi hayo yalipoanza katika Ukanda wa Gaza. Hayo yamejiri wakati Waziri wa Mambo ya Kigeni wa Marekani John Kerry akikutana na viongozi wa eneo hilo katika juhudi za kutafuta usitishaji wa mashambulizi. Akizungumza mjini Jerusalem, Kerry amesema wamepiga hatua kadhaa katika mazungumzo aliyofanya na Katibu Mkuu wa Umoja wa Mataifa Ban Ki Moon. Kerry pia amekutana na Rais wa Wapalestina Mahmoud Abbas mjini Ramallah katika Ukingo wa Magharibi.

Navi Pillay azitaka Israel na Hamas kukoma kuwauwa raia

Mkuu wa Haki za Binaadamu wa Umoja wa Mataifa Bibi Navi Pillay ameishutumu Israel na Hamas kutokana na idadi kubwa ya vifo vya raia katika mgogoro unaoendelea Mashariki ya Kati. Pillay ametoa wito wa kuanzishwa uchunguzi kuhusiana na uwezekano wa kufanyika uhalifu dhidi ya binadaamu. Afisa huyo wa Umoja wa Mataifa pia amezitaka Israel na Hamas kukoma kuwashambulia raia. Mapigano baina ya majeshi ya Israel na wanamgambo wa Kipalestina wa Hamas yalisitishwa kwa muda leo katika maeneo kadhaa ya Gaza, ili kuiruhusu misafara ya magari ya kuwasafirisha wagonjwa kuwaokoa waliojeruhiwa. Takribani Wapalestina 639 wameuawa tangu mashambulizi hayo yalipoanza wiki mbili zilizopita, huku Israel ikisema imewapoteza raia wake 31 wakiwemo wanajeshi.

Miili ya kwanza ya wahanga wa ndege ya Malaysia yawasili Uholanzi

Ndege mbili zilizoibeba miili ya kwanza ya wahanga wa janga la ndege ya abiria ya Malaysia iliyodunguliwa katika anga ya Ukraine wiki iliyopita, zimewasili nchini Uholanzi. Miili hiyo 40 kati ya 298, imewasili mjini Eindhoven na kupokelewa na jamaa na familia za waathiriwa, Waziri Mkuu Mark Rutte na Mfalme Willheim - Alexander. Mabaki ya wahanga wa janga hilo la ndege, yakiwemo ya Waholanzi 193, yatasafirishwa kwenye kambi moja ya kijeshi nchini humo katika kipindi cha siku kadhaa zijazo. Wataalamu kisha wataanza kuitambua miili hiyo, zoezi ambalo huenda likadumu miezi kadhaa. Bendera za nchi 11 zilizowapoteza raia wake katika janga hilo zimepepea nusu mlingoti katika uwanja huo wa ndege. Maafisa wa Ujasusi wa Marekani wanasema wanaamini kuwa waasi wanaoiunga mkono Urusi waliidungua ndege ya abiria ya Malaysia katika anga ya Ukraine. Hata hivyo hawana ushahidi wa kuihusisha moja kwa moja Urusi katika janga hilo.

Waasi waangusha ndege mbili za kivita za Ukraine

Waasi wanaoiunga mkono Urusi leo wamezidungua ndege mbili za kivita za Ukraine katika eneo linalodhibitiwa na waasi ambako ndege ya abiria ya Malaysia ilidunguliwa. Jeshi la Ukraine limesema magaidi walizidungua ndege hizo kwa kutumia makombora, kusini mashariki mwa eneo ilikoangushwa ndege ya Malaysia MH17. Marubani wa ndege zote mbili walifanikiwa kuruka na kujiokoa, lakini hakuna maelezo kuhusu waliko marubani hao. Msemaji wa waasi katika eneo hilo linalojiita kuwa Jamhuri ya Watu wa Donetsk amethibitisha kuwa wamezidungua ndege hizo.

Mbunge wa Somalia apigwa risasi na kuuawa Mogadishu

Mbunge mmoja mwanamke nchini Somalia amepigwa risasi na kuuawa leo katika mji mkuu Mogadishu. Kapteni wa Polisi ya Somalia Mohamed Hussein amesema Saado Ali Warsame, ambaye ni mtunzi na mwimbaji mashuhuri wa muziki alipigwa risasi na genge la watu waliokuwa na silaha wakati akielekea katika hoteli moja ya mjini humo ndani ya gari lake. Dereva wa Warsame pia ameuawa katika shambulizi hilo lililotokea katika wilaya ya Hodan, ambalo linazingatiwa kuwa mojawapo ya maeneo yaliyo salama zaidi mjini Mogadishu kwa ajili ya ulinzi mkali wa vikosi vya serikali. Warsame ni mbunge wa nne wa Somalia kuuawa mwaka huu katika mashambulizi ambayo yanawalenga wabunge. Pia ni tukio la pili la kuuawa mbunge wa Somalia kwa njia hiyo, tangu kuanza kwa mwezi Mtukufu wa Ramadhamani, ambapo pia raia kadhaa na majeshi ya serikali yameuawa katika mashambulizi yanayofanywa na wanamgambo.

Bunge la Iraq kumchagua rais mpya

Bunge la Iraq limeahirisha hadi hapo kesho kikao cha kumchagua rais mpya wa nchi hiyo. Hayo yanajiri wakati wanamgambo wenye msimamo mkali wa Dola la Kiislamu wakidai kuhusika na shambulizi la bimu la kujitoa mhanga lililofanyika katika mji mkuu wa Iraq, Baghdad, na kuwaua watu 31, wengi wao wakwia raia. Lakini licha ya mzozo huo, wabunge wamekuwa wakijaribu kuafikiana kuhusu serikali mpya kufuatia uchaguzi wa Aprili - ambao kundi la Waziri Mkuu Nuri al-Maliki lilipata wingi wa viti bungeni. Baada ya kucheleweshwa mara kadhaa, wabunge walimchagua kiongozi mwenye msimamo wa wastani kuwa spika wa bunge mnamo Julai 15, ikiwa ndio hatua ya kwanza ya kuundwa serikali mpya. Ya pili ni kumchagua rais atakayechukua nafasi ya Rais Jalal Talabani, ambaye muhula wake unafikia kikomo. Karibu wagombea 95 wanawania wadhifa huo.

Joachim Löw aahidi kuendelea kuingoza "Die Mannschaft"

Na katika michezo, kocha aliyeiongoza timu ya Ujerumani katika kushinda Kombe la Dunia nchini Brazil, Joachim Löw amethibitisha nia yake ya kusalia katika wadhifa huo, badala ya kutafuta changamoto mpya mahali kwingine. Löw amesema  analenga kufanya kazi na timu ya taifa na kiongoza katika dimba la Euro 2016 nchini Ufaransa, na kuendelea kuiimarisha timu hiyo pamoja na kuwakuza wachezaji. Löw alisaini mkataba uliorefushwa mnamo mwezi Oktoba mwaka jana, ambao unakamilika baada ya Euro 2016, lakini kumekuwa na uvumi wa vyombo vya habari kuwa huenda akataka wadhifa mpya baada ya Kombe la Dunia. Mjerumani huyo mwenye umri wa miaka 54 alichukua uongozi wa timu mwaka wa 2006 baada ya kuwa msaidizi wa Jurgen Klinsmann kutoka mwaka wa 2004.