1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Taarifa ya Habari za Ulimwengu kutoka Idhaa ya Kiswahili ya DW

Habari | 18.12.2014 | 16:56

EU yaidhinisha vikwazo vingine dhidi ya Crimea

Umoja  wa  Ulaya  umekubaliana  kuweka  vikwazo  vipya  dhidi  ya jimbo  lililochukuliwa  na  Urusi  la  Crimea kuonesha  msimamo wake  dhidi  ya  Urusi wakati viongozi  wa  Umoja  wa  Ulaya wakijitayarisha  kujadili  mzozo  unaoongezeka  wa  kifedha  nchini Urusi huku  kukiwa  na  hofu  za  athari  katika  uchumi  wa  mataifa hayo.

Viongozi  hao  ambao  wanakutana  mjini  Brussels  pia  wanaunga mkono mpango  wa  uwekezaji  wa  euro  bilioni  315 wenye  lengo la  kuchochea  uchumi  wa  mataifa  ya  Ulaya  unaodorora, licha  ya kuwa  ahadi  za  fedha  taslimu hazitarajiwi  kutolewa.

Mkutano  huo  wa  kwanza  kuongozwa  na  rais  mpya  wa  baraza la  Ulaya  Donald Tusk , kiongozi  wa  zamani  wa  Poland , unakuja huku  kukiwa  ya  hali  ya  kuporomoka  kwa  sarafu  ya  Urusi  ya rouble kutokana  na  vikwazo  vya  mataifa  ya  magharibi  na kupungua  kwa  bei  ya  mafuta.

Kansela  wa  Ujerumani  Angela  Merkel amesema  kabla ya  kwenda mjini  Brussels  kwamba  vikwazo  vya  mataifa  ya  magharibi  dhidi ya  Urusi  havikwepeki hadi  pale rais Vladimir Putin atakaporuhusu Ukraine  huru  na  iliyoungana.

Viongozi wa dunia wasifu hatua za Marekani na Cuba

Rais  wa  zamani  wa  Marekani Jimmy Carter  amesema  anajisikia mwenye  furaha  kwa  juhudi  za  rais Obama kurejesha  uhusiano wa  kidiplomasia  na  Cuba. Carter ameiita  hatua  hiyo  ya mabadiliko  ya  sera  kuwa  ya  kishupavu. Carter  anapuuzia shutuma  kuwa  rais Barack Obama  anawafurahisha  viongozi  wa kikomunist  wa  Cuba., kama  anavyosema  seneta  wa  chama  cha Republican Marco Rubio.

Amesema leo  kuwa  njia  sahihi  ya  kuleta  demokrasia  kwa Wacuba  ni  kuwaruhusu  Wamarekani  kwenda  nchini  humo kufanya  biashara  na  kuwekeza.

Carter  alijaribu  kurejesha  uhusiano  na  Cuba  muda  mfupi baada ya  kuingia  madarakani  mwaka 1977, kwa  kuanzisha  ubalozi  wa Marekani  na  kujadili kuachiliwa  huru  kwa  maelfu  ya  wafungwa.

Wakati  huo  huo  kiongozi  wa  kanisa  Katoliki  Papa  Francis amesifu  hatua  ndogo  za  kidiplomasia  zinazofikiwa  ambazo zimeleta  mahusiano  bora  kati  ya  Marekani  na  Cuba.

Azimio la Palestuina ni kutangaza vita- Israel

Waziri  wa usalama  wa  Israel  Yuval Steinitz  amesema  leo  kuwa mswada  wa  azimio  uliowasilishwa  kwa  niaba  ya  Palestina katika  baraza  la  Usalama  la  Umoja  wa  Mataifa  ni  tangazo  la vita. Waziri Steinitz  amesema  hiyo si  hatua  ya  amani , bali  ni hatua  ya vita  ambayo  Palestina  inaelekeza.

Waziri Steinitz  ameiambia  radio  ya  Israel,  iwapo  mamlaka  ya Palestina  itaendelea  kukandamiza  majadiliano  ya  amani  na kuelekea  katika  hatua  za  kipekee  za  kidiplomasia  dhidi  ya Israel , nchi  hiyo  itafikiria  fursa  zote, ikiwa  ni  pamoja  na  kuivunja mamlaka  hiyo.

Jordan , kwa  niaba  ya  wapalestina, imewasilisha  mswada  wa mwisho  jana, ambao  unatoa  wito  wa  makubaliano  ya  amani katika  muda  wa  mwaka  mmoja  baada  ya  mswada  huo kuidhinishwa  na  Israel  iondoe  majeshi  yake  kutoka  katika  ardhi inayoikalia  kabla  ya  mwisho  wa  mwaka  2017.

Bunge lajadili mabadiliko ya sheria za usalama Kenya

Serikali  tisa  za  mataifa  ya  magharibi  zimekaribisha mapendekezo  ya  mabadiliko  katika  sheria  za  usalama  nchini Kenya, lakini zimesema  sheria  hizo  ni  lazima  ziheshimu  haki  za binadamu.

Katika  taarifa  ya  pamoja  iliyotolewa  jana, mabalozi  tisa  kutoka nchi  ambazo  ni  pamoja  na  Marekani, Ujerumani  na  Uingereza wamekaribisha  juhudi  za  serikali  kupitia  upya  na  kufanyia mageuzi sheria  za   usalama   nchini  humo  kutokana  na  mfululizo wa  mashambulizi  ya  kigaidi  ambayo  yametokea  nchini  humo katika  miaka  ya  hivi  karibuni.

Bunge la kenya linaendelea na kikao maalum  leo kujadili mapendekezo ya mabadiliko hayo ya sheria na linatarajiwa  kupiga kura  leo kuyaidhinisha.

Makundi  ya  kutetea  haki  za  binadamu, vyombo  vya  habari  na muungano  wa  vyama  vya  upinzani  nchini  Kenya  vinapinga mabadiliko  hayo  ya  sheria  za  usalama , yakisema  sheria  hizo zitazuwia  haki  za  msingi  za  uhuru  zilizomo  katika  katiba. Rais Uhuru  Kenya  ameliomba  bunge  kupitisha  sheria  hizo.

Sheria ya majimbo ya kupigia kura Misri

Misri  leo imeondoa  kikwazo cha  mwisho  katika  uchaguzi  uliokuwa ukisubiriwa  kwa  muda  mrefu  unaoangaliwa  kuwa  muhimu kuimarisha  madaraka  ya  Abdel Fattah al-Sisi , ambaye alimuondosha  madarakani  rais Mohammed  Mursi , na  kukipiga marufuku  chama  cha Udugu  wa  Kiislamu  kushiriki  siasa  za  nchi hiyo.

Mswada  wa  sheria  unaoainisha  wilaya  za  uchaguzi  bado unahitaji  kuidhinishwa  na  Sisi, ambaye  alishinda  uchaguzi  wa rais  Mei  mwaka  huu  baada  ya  kuliongoza  jeshi  kumuondoa Mursi, lakini  hilo  linaonekana  kuwa  ni  jambo lisilo hitaji mjadala .

Wamisri  wengi  wanafurahia  mkono  wa  chuma  wa  utawala  wa al-Sisi  baada  ya  karibu  miaka  minne  ya   vurugu  lililotokana  na vuguvugu  la maandamano  ya  umma  ya  mwaka  2011, lakini wakosoaji  wanasema  anachelewesha  uchaguzi ili kuimarisha madaraka  yake.

Mshambuliaji wa Mumbai apewa dhamana

Mahakama  ya  Pakistan  leo imempa dhamana  anayetuhumiwa kupanga  shambulio  la  kigaidi mjini  Mumbai  mwaka  2008. Kuzingirwa kwa muda wa  saa  60  katika  mji  mkuu  wa  kiuchumi wa  India  kulisababisha  watu 166  kupoteza  maisha  na kulalamikiwa  kusababishwa na  kundi  la  Pakistan  la  Lashkar-e-Taiba.

Uhusiano  kati  ya  India  na  Pakistan  nchi  mbili zenye  silaha  za kinyuklia  uliharibika  zaidi  baada  ya  shambulio  hilo, ambapo  watu 10  waliokuwa  na  silaha  walishambulia  hoteli  moja  ya  kifahari, mkahawa  maarufu , kituo  cha  treni  na  kituo  cha  Wayahudi.

Zaki-ur-Rehman Lakhvi , anayetuhumiwa  kupanga  tukio  hilo, alipewa  dhamana  na  jaji  katika  mji  mkuu  Islamabad.

Waziri  wa  mambo  ya  ndani  wa  India  Rajnath Singh  amesema uamuzi  huo haukustahili.

          

Waasi wa FARC watangaza kusitisha mapigano

Kundi  kubwa  la  waasi  nchini  Colombia  la  FARC limetangaza kusitisha  kabisa  mapigano jana, likisema  wapiganaji  wake  wa chini  kwa  chini wataacha  kufanya  mashambulizi  iwapo hawatashambuliwa na  jeshi  linaloungwa  mkono  na  Marekani.

Kundi  hilo The Revolutionary Armed Forces of Colombia , FARC limetoa  tangazo  hilo  nchini  Cuba  mwishoni  mwa  duru  nyingine ya  mazungumzo  ya  amani  yenye  lengo  la  kumaliza  mapigano ya  muda  mrefu  kabisa  katika  Amerika  ya  kusini.

Katika  taarifa  iliyotiwa  saini  na sekretariati  inayoongoza  kundi hilo  la  FARC , waasi  wameeleza  matumaini  kuwa  hatua  hiyo  ya kusitisha  mapigano  itakayoanza  rasmi usiku  wa  manane Desemba  20 , itaingia katika  hatua  ya  msamaha , na  kusema itaomba  msaada  wa  mataifa  kadhaa  ya  Amerika  ya  kusini  na shirika  la  msalaba  mwekundu  kuangalia   utekelezwaji  wa  hatua hiyo.