1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Taarifa ya Habari za Ulimwengu kutoka Idhaa ya Kiswahili ya DW

Habari | 04.03.2015 | 15:32

Netanyahu atetea hotuba yake kwenye Congress ya Marekani

Waziri Mkuu  wa  Israel,  Benjamin  Netanyahu, ameitetea hotuba yake ya jana kwenye bunge la Marekani ambayo iliionya vikali Marekani dhidi ya makubaliano yoyote ya kinyuklia na Iran, akisema hotuba hiyo ilitoa jibu kwa hatua zinazopasa kuchukuliwa.

Netanyahu alitoa Utetezi huo muda mfupi baada ya kuwasili nchini kwake akitokea Marekani  leo, na unakuja masaa machache tu baada ya Rais  Barack Obama wa Marekani kusema nchi yake haina nia ya kuweka saini makubaliano yanayoiwezesha Iran kumiliki silaha za kinyuklia kama ilivyosemwa na Netanyahu.

Obama  amemkosoa Waziri Mkuu huyo wa Israel kwa kutokutoa ushauri mbadala wa maana kuhusiana na makubaliano kati ya mataifa makubwa duniani na Iran. Netanyahu amesema kwamba makubaliano hayo ni  mabaya  na  dunia  itakuwa  katika  hali  bora bila  ya  makubaliano  hayo.

Wakati  huo  huo,  spika  wa  baraza  la  Seneti  la  Marekani Mitch McConnell  amesema  jana  kwamba  baraza  la  Seneti  litaanza mjadala  wiki  ijayo  juu  ya  mswada  ambao  utamtaka Rais Obama kuwasilisha  makubaliano  yoyote  ya  mwisho  ya  kinyuklia  na  Iran ili  kuidhinishwa  na  baraza  la  Congress, hatua  iliyowakasirisha wabunge  wa  chama  tawala  cha  Democratic.

Marekani na Iran zapiga hatua

Mawaziri  wa  mambo  ya  kigeni  wa  Marekani  na  Iran wamemaliza  mazungumzo  yao  ya  siku  tatu  kuhusiana  na mpango  wa  kinyuklia  wa  Iran  leo, siku  moja  baada  ya  Waziri Mkuu  wa  Israel Benjamin  Netanyahu  kusema  makubaliano yanayojadiliwa  ni  makosa  makubwa.

Waziri  wa  mambo  ya  kigeni  wa  Marekani  John Kerry   na mwenzake  wa  Iran Mohammad Javad Zarif  wamejadiliana  kwa muda  wa  masaa 10  tangu  Jumatatu  katika  mji  wa  Montreux nchini  Uswisi , kwa  matarajio  ya  kufanyia  kazi utaratibu  wa makubaliano  hayo ifikapo  mwishoni  mwa  mwezi  huu.

Afisa  mwandamizi  wa  wizara  ya  mambo  ya  kigeni  ya  Marekani amesema  pande  hizo  mbili  zimepiga  hatua  lakini bado kuna changamoto  nyingi  mbele.

Umoja wa Ulaya kuangalia upya uhusiano na majirani zake

Umoja  wa  Ulaya  umeanzisha  mapitio   ya  kina  ya  sera  yake kuelekea  majirani  zake  wa  kimkoa  leo kutokana  na  mzozo  wa Ukraine  na   hali  ya  machafuko  katika  eneo  la  kaskazini  mwa Afrika  na  mashariki  ya  kati. 

Katika  mwaka  2003  Umoja  wa  Ulaya  ulitoa  sera  yake  ya kwanza  kwa  nchi  jirani  na   mataifa  ya  Umoja  wa  Ulaya  ikiwa na  matumaini  kwamba  inaweza  kujenga  mahusiano  ya  karibu pamoja  na  mataifa  ya  kikomunist  upande  wa  mashariki mwa bara  la  Ulaya , ikiwa  ni  pamoja  na  Urusi  pamoja  na  serikali ambayo  wakati  huo  ilikuwa  imara  kama  ya  rais  Hosni  Mubarak wa  Misri.

Lakini  hali  imebadilika  kwa  kiasi  kikubwa   tangu  mwaka  2011 wakati  wa  vuguvugu  la  mageuzi  katika  mataifa  ya  Kiarabu  na ghasia  nchini  Ukraine, na  kusababisha  serikali  mpya  mjini  Kiev na  waasi  wanaoungwa  mkono  na  Urusi.

Mkuu  wa  sera  za  mambo  ya  kigeni  wa  Umoja  wa Ulaya Federica  Mogherini  amesema  Umoja  wa  Ulaya  unapaswa kujiondoa kutoka  sera  inayowajumuisha  washirika  wao  wote licha ya  kuwa  na  matarajio, maadili  na  maslahi  tofauti.

Zaidi ya wafanyakazi 30 hawajulikani waliko

Zaidi  ya  wafanyakazi  30  wa  machimbo  ya  mkaa  wa  mawe wameripotiwa  kuwa  hawajulikani  walipo baada  ya  mripuko  leo katika  machimbo  hayo  katika  eneo  linalodhibitiwa  na  waasi upande  wa  mashariki  mwa  Ukraine.

Uongozi  wa  jimbo  la  Donetsk umesema  katika  taarifa  kuwa mripuko  huo  katika  mgodi  wa  Zasyadko  umesababisha  kifo  cha mtu  mmoja  na  wengine 16  wamejeruhiwa.

Taarifa  hiyo  imeongeza  kuwa  watu  32  miongoni  mwa wafanyakazi  230  walikuwa  katika  mgodi  huo wakati  wa  mripuko hawajulikani  waliko. Mkuu  wa  wapiganaji  wanaotaka  kujitenga wanaoungwa  mkono  na  Urusi  ambao  wanadhibiti  jimbo  la Donetsk  ametoa  idadi  kama  hiyo  iliyotolewa  na  serikali  ya Ukraine.

Spika  wa  bunge  la  Ukraine  Volodymyr  Groysman amesema  hapo mapema  kuwa  watu  32  wameuwawa  katika  mripuko  huo. 

Upinzani waunda serikali Lesotho

Kiongozi  wa  chama  kikuu  cha  upinzani  nchini  Lesotho ametangaza  kuunda serikali  ya  mseto  pamoja  na   vyama  vidogo baada  ya  uchaguzi  uliofanyika  hapo  Februari 28 kutompata mshindi  wa  moja  kwa  moja.

Pakalitha  Mosisili , kiongozi  wa  chama  cha  Democratic Congress, amesema  katika  mji  mkuu  Maseru  leo kwamba  ataunda  serikali pamoja  na  chama  cha  naibu  waziri   mkuu  wa  zamani  Mothetjoa Metsing cha  Lesotho Congress fo Democracy pamoja  na  vyama vingine  kadhaa  vidogo  ili  kupata  wingi  unaotosha.

Bunge  nchini  Lesotho  lenye  viti  120  linapatikana  kupitia  mifumo mbali  mbali  ya  uchaguzi , ambapo  wabunge  80  wanapatikana kupitia  kura  katika  majimbo  ya  uchaguzi  na  viti  40  vinatokana na  kila  chama  kilivyopata  viti bungeni. Muungano  mpya  una  viti 61 bila  ya  wabunge  wa  kuteuliwa.

Chama  cha  Democratic Congress  kimeshinda  viti 37, wakati chama  cha  waziri  mkuu Thomas Thabane  cha All Basotho Convention  kimepata  viti  40. Tume  ya  uchaguzi  bado haijatangaza  matokeo  rasmi.

38 wafa kwa mafuriko Tanzania

Kiasi  ya  watu  38  wamefariki dunia na  wengine  82  kujeruhiwa katika  mvua  kubwa  iliyonyesha na  kusababisha  mafuriko kaskazini  magharibi  mwa  Tanzania  leo.

Mvua  kubwa iliyochanganyika na mvua  ya  mawe   pamoja  na upepo  mkali  vimeikumba  wilaya  ya  Kahama   katika  mkoa  wa Shinyanga  nchini  Tanzania  jioni  ya  jana, imesema  taarifa  kutoka ofisi  ya  rais  mjini  Dar es Salaam , ikieleza  kushitushwa  kwake na  kueleza  masikitiko  makubwa.

Maafisa  wamesema  watu  wanaokadiriwa  kufikia  3,500 katika mkoa  huo, eneo  masikini  la  wakulima  kusini  mwa  Ziwa  Victoria na  karibu  na  mbuga  ya  wanyama  ya  Serengeti  wameathirika  na mafuriko.

Ndege za kijeshi zashambulia Libya

Ndege  mbili  za  kivita  ambazo  hazikutambuliwa  ni za  nchi  gani zimeshambulia  leo  katika  mji  wa  kaskazini  nchini  Libya  wa Zintan , na  kuharibu  mfumo  wa  umeme  lakini  hazikuharibu  njia ya   kurukia  ndege  katika  uwanja  wa   mji  huo.

Mji  wa   Zintan unahusishwa  na  serikali  inayotambuliwa  kimataifa nchini  Libya. 

Libya  imo  katika  mzozo  baina  ya  serikali  mbili  hasimu  pamoja na  majeshi  yake, ambayo  yanapambana  kutaka  udhibiti  nchini humo,  miaka  minne  baada   ya  vita  vya  wenyewe  kwa  wenyewe kumuondoa  kiongozi  wa  nchi  hiyo  Muammar Gaddafi  na kulitumbukiza  taifa  hilo  la  Afrika  ya  kaskazini  katika  machafuko.