Gripi i derrave- çfarë e bën atë kaq të rrezikshëm?

Gripi i derrave ndryshon nga gripi i shpendëve

Edhe derrat mund të sëmuren nga gripi dhe madje nga gripi i vërtetë. Ndërkohë që virusi që shkakton këtë sëmundje është ngjitës dhe mund të kalojë shumë lehtë tek njeriu. Kjo sëmundje dallohet nga gripi i shpendëve.

A ekziston gripi i derrave edhe te derrat e Evropës?

Në kushtet normale ky virus nuk është asgjë i veçantë dhe i rrezikshëm. Gati çdo i dyti derr në zonat e Amerikës, prej nga edhe vjen kjo sëmundje, ka pasur kontakt me këtë virus dhe ka krijuar imunitet. Sëmundja ndërkohë duhet të jetë përhapur edhe në Evropë, por pronarët e derrave nuk janë të obliguar të lajmërojnë për të. Prandaj nuk dihet me saktësi, nëse kjo sëmundje me të vërtetë ekziston edhe në Evropë.

Janë dy gjëra që shqetësojnë mjekësinë e sotme: Së pari, në kohën e pandemisë së vitit 1918, e njohur edhe si "Gripi i Spanjës", kishte një valë infektimesh të derrave nga gripi. Dhe së dyti, derri njihet si bartës i virusit, ku virusët shumëzohet dhe përzihen me virusë të tjerë.

Rrezik përbën përzierja e viruseve

Shkencëtarët mendojnë se pikërisht një përzierje e tillë virusesh ka ndodhur në vitin 1918, në vitin 1957 me gripin aziatik dhe në vitin 1968 me gripin e Hongkongut. Pra viruset e gripit të shpendëve dhe viruset aspak të rrezikshëm të njerëzve janë përzier dhe kanë kaluar në derra, duke prodhuar kështu një virus të rrezikshëm.

Organizata Botërore e Shëndetësisë pohon se virusi më i ri në Meksikë është një tip i ri i virusit H1N1, i cili paraqitet tek njerëzit, shpendët dhe derrat.

Virusi ka prekur të rinjtë dhe kjo sinjalizon pandemi

Fakti që në Meksikë më shumë janë goditur njerëzit e moshës 20 deri 40 vjeç, të kujton pandeminë e vitit 1918, sepse në kushtet normale, fëmijët dhe të moshuarit janë ata të cilët preken më shumë prej virusit të gripit. Në rastet e fundit, virusi ka sulmuar njerëzit e kësaj moshe.

Ekspertët prej kohësh presin një pandemi, pra një valë gripi që do të përfshinte tërë botën. Mirëpo nuk llogaritet me një numër të madh vdekjesh, si në kohërat e kaluara. Si pasojë e "Gripit të Spanjës" kanë vdekur të paktën 20 milionë njerëz. Sipas disa të dhënave të pakonfirmuara, nga pasojat e këtij gripi kanë vdekur madje dyfish më shumë njerëz, por duhet ditur se në ato kohëra të luftës dhe urisë, imuniteti i njerëzve ishte shumë më i dobët. Valët e tjera të gripit më vonë nuk kanë pasur kurrë këto përmasa, në sajë të masave më të shpejta mjekësore dhe medikamenteve më të mira.

Autor: Werner Eckert/ Bahri Cani

Redaktoi: Auron Dodi