Спорт

На севернокорејските фудбалери им се заканува логор

ФИФА ќе поведе истрага за можно малтретирање на фудбалерите и стручниот штаб на Северна Кореја од страна на властите во земјата, по лошиот настап на Мундијалот во Јужнa Aфрика. Дали селекторот завршил во работен логор?

Севернокореецот Јонг Тае Се за време на интонирањето на државната химна во Јужна Африка

Светската фудбалска федерација ФИФА отвори истрага по наводите дека властите во Северна Кореја ги малтретирале играчите и стручниот штаб по катастрофалниот настап на Светското првенство во Јужнoафриканската Република.

Претседателот на ФИФА, Сеп Блатер денеска потврди дека било испратено барање до фудбалскиот сојуз на Северна Кореја за информации за наводното малтретирање, како и за смената на претседателот на националната фудбалска федерација.

„Се работи за истрага со која треба да се информираме за изборот на новиот претседател на фудбалскиот сојуз, и доколку е тоа вистина, за тврдењата на некои медиуми дека тренерот и одредени играчи биле осудени и казнувани“, изјави Блатер.

Радиото Слободна Азија, повикувајќи се на неименувани извори, јави дека фудбалерите и стручниот штаб биле повикани во Пјонгјанг, каде цели шест часа биле критикувани од државни функционери поради настапот на Мундијалот. На фудбалерите, наводно, им било наредено за поразите да го обвинат селекторот Ким Јонг Хун.

Селекторот Ким Јонг Хун

Според непотврдените информации, фудбалерите биле јавно понижувани, а селекторот Ким бил осуден на тешка физичка работа поради трите порази од Бразил, Португалија и Брегот на Слоновата Коска. Посебно понижувачки беше поразот на севернокорејците од Португалија со 7:0, особено затоа што тоа беше и првиот натпревар на фудбалската репрезентација пренесуван во живо на државната телевизија, по пауза од повеќе од 40 години.

автор: БГ/афп/бета

редактор: Трајче Тосев