Theo Albrecht themeluesi i Aldi-t, rrjeti gjerman të tregtimit me çmime skonto ndërron jetë

Theo Albrecht qysh përpara se të ndahej nga jeta kishte menduar për rregullimin e trashëgimisë dhe të ardhmen e grupit, u bë e ditur të mërkurën (28.07) nga sipërmarrja e tij. Prej vitesh sipërmarrja drejtohet nga menaxherë, të cilët të gjitha vendimet operative i marrin krejtësisht të pavarur nga familja pronare e firmës.

Theo Albrecht bashkë me vëllain e tij më të moshuar, Karl Albrecht janë themeluesit e rrjetit të shitjes së ushqimeve me skonto për masën, Aldi. Më pas të dy themeluesit e ndanë midis tyre sipërmarrjen. Theo Albrecht mori përsipër drejtimin e Aldi Nord dhe vëllai i tij drejtonte Aldi Süd.

Sipas informacioneve të revistes "Der Spiegel" 88 vjeçari Theo Albrecht ishte prej kohësh i sëmurë rëndë. Pasi ishte rrëzuar, ai disa javë i kaloi në një spital në qytetin e lindjes Esen dhe prej asaj dite nuk e mori më veten.

Dyqani i ushqimeve i trashëguar nga nëna

Gurin themeltar për sipërmarrjen të dy vëllezërit e vendosën pasi në vitin 1948 ata morën përsipër së bashku dyqanin e ushqimeve të nënës së tyre. Pas vitit 1961 dyqani i ushqimeve me çmime skonto mori emrin Aldi. Në 50 vitet që pasuan Theo dhe Karl Albrecht krijuan një koncern miliardësh, që ndryshoi dukshëm pejzazhin e tregtisë në Gjermani.

Rrëmbimi në vititn 1971

Logoja e Aldit

Theo Albrecht shumë rrallë ka tërhequr vëmendjen e medias, ai u bë publik në media në vitin 1971, kur u mbajt peng nga një avokat mbrojtës nga Dyseldorfi dhe një kriminel, të cilët e lanë të lirë vetëm pas pagesës së një shume prej shtatë milionë markash. Asokohe kjo ishte shuma më e madhe e paguar ndonjëherë në Republikën Federale të Gjermanisë. Peshkopi i Esenit dhe Ruhrit Franz Kardinal Hengsbach i dorëzoi këto para, pjesa më e madhe e të cilave nuk është rigjetur as sot e kësaj dite.

Forbes: Njeriu i dytë më i pasur në Gjermani

Në listën e më të pasurve që publikon rregullisht revista "Forbes" në SHBA, Theo Albrecht konsiderohet si njeriu i dytë më i pasur në Gjermani me një pasuri prej 17 miliardë eurosh. Vendin e tretë në Gjermani e zë vëllai i tij Karl.

Autor: Gerd Winkelmann (afp, dpa,ap)/ Vilma Filaj-Ballvora

Redaktoi: Auron Dodi