Спорт

Хокеј-турнирот во центарот на вниманието

Хокеарскиот турнир кај мажите донесе најмногу возбудувања на Олимписките игри во Ванкувер. Во големото дерби, домаќинот Канада ја надигра Русија, совладувајќи ја со 7:3. Словаците го елиминираа шампионот Шведска.

Во последниот четвртфинален дуел на турнирот во хокеј на мраз што заврши рано утрово, олимпискиот шампион од Торино, Шведска, е елиминирана по поразот од Словачка со 4:3. Противник на Словаците во полуфиналето ќе им биде домаќинот Канада, откако ја совладаа Русија со 7:3 и конечно успеаја да ја прекинат серијата порази од Русите. Најнеизвесно четвртфинале одиграа САД и Швајцарија, во кое Американците дури во финишот го скршија отпорот на противникот. Со истиот резултат од 2:0 Финска ја победи Чешка. САД – Финска ја сочинуваат втората полуфинална двојка.

Два медала за домаќините на тринаесеттиот ден на Игрите донесоа боб тимовите во женскиот двосед. Кели Хемфрис и Хетер Мојс го освоија златото, додека Хелен Апертон и Шели Ен Браун освоија бронза. Американките Ерин Пак и Елена Мејерс освоија сребро.

Во брзо лизгање на патеката од 5.000 метри нов златен медал за Мартина Сабликова од Чешка. Ова за неа е трет медал во Ванкувер, втор златен остварен со олимписки рекорд. Среброто го освои Стефани Бекерт од Германија, а бронзата Клара Хјуз од Канада.

Машката штафета на Шведска победи на трката 4 пати 10 километри во бијатлон и бронзата од Торино ја претворија во злато, пред Норвешка и Чешка.

Поради магла на велеслалом патеката се одржа само првата трка во женска конкуренција, а денеска треба да биде комплетирано ова натпреварување.

Во досегашниот тек од натпреварите, САД имаат најмногу освоени медали - 28, пред Германија со 24, Норвешка со 18, и домаќинот Канада со 15. По седум златни одличја имаат САД, Германија и Канада.

Автор: БГ/СН/миа.

Редактор: Жана Ацеска