برطانوی اور جاپانی سائنسدان، طب کے نوبل انعام کے حق دار

سویڈش دارالحکومت میں کارولنسکا انسٹیٹیوٹ کے اعلان کے مطابق امسالہ نوبل انعام برائے طب کا حق دار مشترکہ طور پر برطانوی ماہر حیاتیات جان بی گَرڈَن’ John Gurdon‘ اور جاپانی ڈاکٹر شِنیا یاماناکا ’Shinya Yamanaka ‘ کو قرار دیا گیا ہے۔ اس ادارے نے مزید بتایا کہ ان دونوں محققین کو خَلیات پر ان کی تحقیق کی وجہ سے نوبل انعام دیا جا رہا ہے۔ ان دونوں نےاپنی تحقیق میں ثابت کیا ہے کہ سیلز یا خَلیات کی خصوصیات بدلی جا سکتی ہیں۔ اس کا مطلب یہ ہوا کہ سیلز میں پیدا شدہ تبدیلی کو ختم کرتے ہوئے انہیں واپس ان کی اصل شکل میں لایا جا سکتا ہے۔

نوبل اسمبلی نے اپنے ایک بیان میں کہا کہ برطانوی اور جاپانی محقق نے سیلز یا خَلیات کی خصوصیات کے بارے میں پائے جانے والے تصور کو مکمل طور پر تبدیل کر کے رکھ دیا ہے۔

برطانوی سائنسدان جان گَرڈَن کی عمر اس وقت 79 اناسی برس ہے اور ان کا تعلق کیمرج یونیورسٹی سے ہے۔ گَرڈَن نے اپنی اس تحقیق کو بالغ افراد کے سیلز میں سے ایمبریو سیلز حاصل کرنے کے طریقے تلاش کرنے کی کوشش قرار دیا ہے۔ اس ساری تحقیق کا مقصد ہر قسم کے سیلز میں سے ہر قسم کے سیلز کا متبادل تلاش کرنا ہے۔ مثلاً ہم کوئی ایسا طریقہ ڈھونڈنا چاہیں گے، جس کی مدد سے ہم جلد یا خون کے سیلز میں سے دل یا دماغ کے اضافی سیلز حاصل کر سکتے ہوں۔

پچاس سالہ ڈاکٹر شِنیا یاماناکا کیوٹو یونیورسٹی سے منسلک ہیں۔ اس موقع پر جاپانی سائنسدان کا کہنا تھا کہ نوبل انعام ان کے لیے ایک بہت بڑا اعزاز ہے۔ اور ساتھ ہی ان کے، ان کے ساتھیوں اور اس موضوع پر تحقیق کرنے والے تمام سائنسدانوں کے لیے ایک بہت بڑی حوصلہ افزائی ہے۔

عالمی اقتصادی بحران کی وجہ سے نوبل انعام یافتگان کو انعام کے طور پر ملنے والی رقم بھی کم کر دی گئی ہے۔ اب دس ملین سویڈش کرونے کے بجائے آٹھ ملین کرونے دیے جائیں گے، جو لگ بھگ 9 لاکھ 30 ہزار یورو بنتے ہیں۔ یہ انعامات باقاعدہ ایک تقریب میں نوبل انعام کے بانی الفریڈ نوبل کے یوم وفات کے موقع پر 10 دسمبر کو دیے جائیں گے۔ الفریڈ نوبل 1833ء میں پیدا ہوئے تھے اور ان کی وفات 1896ء میں ہوئی تھی۔

سویڈن میں ہر سال پانچ مختلف شعبوں میں نوبل انعام دیے جاتے ہیں۔ ان میں طب، امن، طبیعیات، کیمیا اور ادب کے شعبے شامل ہیں۔ گزشتہ برس طب کے شعبے میں نوبل انعام امریکی سائنسدان بروس بیوٹلر Bruce Beutler، لکسمبرگ میں پیدا ہونے والے فرانسیسی سائنسدان ژُول ہوفمان Jules Hoffmann اور کینیڈین نژاد امریکی سائنسدان رالف سٹائنمن Ralph Steinman کو مشترکہ طور پر انسان کے مدافعتی نظام پر ان کی تحقیق کی وجہ سے دیا گیا تھا۔

ai / aa ( Reuters , AFP)