پاکستانی وزیر اعظم کو دو ہفتوں کی مزید مہلت

تاہم پاکستانی حکومت کا تاحال یہی مؤقف ہے کہ وہ صدر آصف علی زرداری کے خلاف بدعنوانی کے مقدمات کھلوانے کے لیے سوئس حکام کو خط نہیں لکھے گی۔ اسی مؤقف پر سابق وزیر اعظم یوسف رضا گیلانی کو سپریم کورٹ کی طرف سے توہین عدالت کا مجرم قرار دیتے ہوئے وزارت عظمیٰ اور رکن پارلیمان کے طور پر نا اہل قرار دیا گیا تھا۔

این آر او سے متعلق عدالتی فیصلے پر عملدرآمد کے حوالے سے آج بدھ کے روز ہونے والی عدالتی سماعت کے دوران اٹارنی جنرل نے سپریم کورٹ کو بتایا کہ چونکہ آئین کے تحت ملکی صدر کو عہدہ صدارت پر رہتے ہوئے عدالتی کارروائی سے استثنیٰ حاصل ہے اس لیے نئے وزیر اعظم راجہ پرویز اشرف بھی سوئس حکام کو خط لکھنے کے حق میں نہیں ہیں۔

اس مقدمے کی سماعت کرنے والے بینچ کے سربراہ جسٹس آصف سعید کھوسہ نے کہا ہے کہ اگر حکومت خط لکھنے کو تیار ہو جاتی ہے تو عدالت صدر کو حاصل استثنیٰ کا لحاظ کرے گی۔ اٹارنی جنرل کی طرف سے اس درخواست کے بعد کہ حکومت اور عدلیہ کے درمیان جاری تناؤ کو حل کرنے کے لیے حکومت کی طرف سے سنجیدہ اقدامات کے لیے مزید وقت دیا جائے، عدالت نے اس مقدمے کی سماعت آٹھ اگست تک ملتوی کر دی۔

جسٹس کھوسہ کا اس حوالے سے کہنا تھا، ’’ہمیں یقین ہے کہ عدلیہ اور حکومت کے درمیان طے شدہ اختیارات کے حوالے سے مسئلے کا حل نا ممکن نہیں ہے۔‘‘

منگل 24 جولائی کو اٹارنی جنرل نے عدالت سے درخواست کی تھی کہ چونکہ عدالتی حکم آئین کے منافی اور ناقابل عمل ہے، لہٰذا اسے واپس لیا جائے۔

حکومت کی طرف سے توہین عدالت سے متعلق جلد بازی میں منظور کیے گئے نئے قانون کے باوجود ملکی سپریم کورٹ نے وزیراعظم راجہ پرویز اشرف کو حکم دیا تھا کہ صدر زرداری کے خلاف مقدمات دوبارہ کھلوانے کے لیے 25 جولائی تک سوئس حکام کو خط لکھیں ورنہ ان کے خلاف قانونی کارروائی ہو گی۔

aba/aa (AP, AFP)