تیس فیصد مچھلیوں کا شکار حد سے زیادہ، ایف اے او

اٹلی کے دارالحکومت روم میں قائم اقوام متحدہ کے ادارہ برائے خوراک و زراعت FAO نے کہا ہے کہ اس کے زیر مشاہدہ سمندری مچھلیوں کے ذخائر میں سے قریب 30 فیصد کو بے دریغ استعمال کیا جا رہا ہے۔ فوڈ اینڈ ایگریکلچرل آرگنائزیشن کے مطابق یہ صورت حال دیرپا بنیادو‌ں پر ماہی گیری کو یقینی بنانے کی کوششوں کو متاثر کر رہی ہے۔

ایف اے او نے یہ بات سال 2012 کے لیے اپنی ورلڈ فشریز رپورٹ میں کہی ہے۔ یہ رپورٹ ابھی حال ہی میں روم میں جاری کی گئی۔ رپورٹ کے مطابق کئی قسموں کی ان مچھلیوں کے حد سے زیادہ شکار کی وجہ سے مچھلیوں کے سمندری ذخیروں کا مجموعی توازن خراب ہو رہا ہے۔

اس کے علاوہ جہاں ان مچھلیوں کو بہت زیادہ شکار کیا جا رہا ہے، وہاں وہ قدرتی ماحول اور آبی ماحولیاتی نظام بھی متاثر ہو رہے ہیں جنہیں قائم رکھنے میں یہ مچھلیاں بہت اہم کردار ادا کرتی ہیں۔

رپورٹ ‌میں کہا گیا ہے کہ دنیا بھر میں مچھلیوں کی بہت سے اقسام کے سمندری ذخیرے بے دریغ شکار کی وجہ سے دباؤ کا شکار ہیں۔ اس ادارے کے مطابق عالمی برادری کو چاہیے کہ وہ اس بے دریغ شکار کو روکے اور جن مچھلیوں کو بہت زیادہ شکار کیا گیا ہے یا ابھی تک کیا جا رہا ہے، ان کا شکار خاص طور پر کم کیا جائے۔ اقوام متحدہ کے خوراک و زراعت سے متعلق اس ذیلی ادارے کا کہنا ہے کہ حد سے زیادہ شکار کا اثر صرف سمندری ماحول اور ان مچھلیوں پر ہی نہیں پڑتا۔ اس کا نقصان ان کروڑوں انسانوں کو بھی ہو رہا ہے جن کے روزگار اور سماجی حالات کا تعلق ان مچھلیوں اور ان کے شکار سے ہے۔

FAO کی اس رپورٹ کے مطابق گزشتہ ایک سال کے دوران عالمی سطح پر انسانی خوراک کا حصہ بننے کے لیے 128 ملین ٹن مچھلیاں پکڑی گئیں، جو ایک نیا ریکارڈ ہے۔ اس کے علاوہ پوری دنیا میں قریب 55 ملین انسانوں کا روزگار ماہی گیری کے شعبے سے جڑا ہوا ہے۔

ایف اے او کے سربراہ یوزے گراسیانو دا سلوا کے مطابق ماہی گیری کے شعبے میں بہت ذمہ دارانہ رویوں کی ضرورت ہے۔ انہوں نے کہا کہ عالمی آبادی کے 12 فیصد حصے کی آمدنی کا انحصار براہ راست یا بالواسطہ طور پر ماہی گیری پر ہے۔

ایف اے او کے ماہی گیری کے شعبے کے سربراہ Arni Mathiesen کا کہنا ہے کہ فشریز کے شعبے میں ترجیحات کا تعین اور ان پر عملدرآمد نہیں کیا جاتا۔ اس کے علاوہ ماہی گیروں کی چھوٹی چھوٹی برادریوں کے حقوق کی حفاظت بھی نہیں کی جاتی۔

ij / mm (AFP)