جرمن چانسلر انگیلا میرکل نے آج اسد حکومت کے خلاف مزید پابندیاں عائد کرنے کا مطالبہ کیا ہے۔ برلن میں عرب لیگ کے جنرل سیکریٹری نبیل العربی سے ملاقات سے پہلے انہوں نے کہا کہ شام میں قتل و غارت کا سلسلہ بند ہونا چاہیے۔ دوسری جانب شامی افواج کی جانب سے حمص شہر میں مخالفین پر بمباری کا سلسلہ آج بھی جاری ہے۔ سریئن آبزرویٹری فار ہیومن رائٹس کے عہدیدار رامی عبدالرحمن  نے بتایا کہ بابا امر  اور ارد گرد کے علاقوں میں شیلنگ کا سلسہ صبح سویرے سے ہی شروع ہو گیا تھا۔ دریں اثناء شامی صدر بشار الاسد نے شام کے لیے عرب لیگ کے امن منصوبے کو مسترد کر دیا۔ اقوام متحدہ کی ہائی کمشنر برائے انسانی حقوق ناوی پلے نے شامی حکومت پر انسانیت کے خلاف جرائم میں ملوث ہونے کا الزام عائد کیا۔ پلے کے بقول صدر بشار الاسد کی حکومت سلامتی کونسل میں اس کے خلاف قرارداد کی ناکامی کو مخالفین کو کچلنے کے جواز کے طور پر استعمال کر رہی ہے۔

 چین یورپی یونین کے بحران کو حل کرنے میں اپنا تعاون بڑھانے پر تیار ہے۔ یہ بات چینی وزیراعظم وین جیا باؤ نے یورپی یونین اور چین کے سربراہی اجلاس میں کہی۔ انہوں نے مزید کہا کہ چین ایک مضبوط اور مالی اعتبار سے مستحکم یورپ کا خواہاں ہے۔ تاہم انہوں نے یہ نہیں بتایا کہ چین کس طرح سے یورپی بحران کو حل کرنے میں مدد کرے گا۔ یورو زون کو درپیش اقتصادی بحران اور عالمی معیشت کو لاحق خطرات پر بات چیت کے لیے آج منگل کے روز یورپی یونین اور چین کے رہنماؤں کا سالانہ اجلاس ہو رہا ہے۔ اس اجلاس میں چینی صدر وین جیا باؤ یورپی کونسل کے صدر ہیرمن فان رومپوئے، یورپی کمیشن کے صدر ژوزے مانوئیل باروسو اور دیگر یورپی رہنما شرکت کر رہے ہیں۔ باروسو نے چین روانگی سے قبل برسلز میں کہا تھا کہ یورپ اور چین کی مشکلات اور امتحانات باہم ہیں۔ دنیا کو مل جل کر ہی ان مسائل سے نمٹنا ہو گا۔

تھائی حکام کا کہنا ہے کہ دھماکہ خیز مواد لے جانے والے  ایک ایرانی باشندے نے اپنی ہی ٹانگوں کو اڑا لیا ہے۔ حکام کے مطابق بنکاک میں ہونے والے دیگر دو دھماکوں میں چار افراد زخمی بھی ہوئے ہیں۔اسرائیلی وزارت خارجہ کے مطابق بنکاک واقعے میں ایران کے ملوث ہونے کو رد نہیں کیا جا سکتا تاہم تھائی حکام نے ایسے کسی بھی شک کا اظہار نہیں کیا ہے۔ دریں اثناء ایران نے بھارت میں اسرائیلی سفارت خانے کے عملے پر حملے میں ملوث ہونے کا اسرائیلی الزام مسترد کر دیا ہے۔ تہران حکام نے اسے یروشلم حکومت کا پروپیگنڈا قرار دیا ہے۔ قبل ازیں اسرائیلی وزیر اعظم بینجمن نیتن یاہو نے نئی دہلی میں دھماکے  اور تبلیسی میں اسرائیلی سفارت خانے کے ملازم کی کار سے برآمد ہونے والے بم کے پیچھے ایران کا ہاتھ ہونے کا دعویٰ کیا تھا۔ گزشتہ روز بھارت میں اسرائیلی سفارت کار کی گاڑی پر حملہ ہوا تھا، جس کا الزام اسرائیل نے ایران پر عائد کیا تھا۔

پاکستانی شہر پشاور کے ہوائی اڈے پر گرفتار کیے جانے والے امریکی باشندےکو ابتدائی تحقیقات کے بعد رہا کر دیا گیا ہے۔ اسلام آباد میں امریکی سفارتخانے کے ایک اہلکار نے بتایا ہے کہ گرفتار ہونے والا شخص پشاور میں امریکی سفارت خانے میں کام کرتا ہے، جس وجہ سے اسے رہا کر دیا گیا۔ ایئر پورٹ پر تلاشی کے دوران اس امریکی کے پاس سے 12 میگزین راؤنڈز اور ایک پستول برآمد ہوا تھا، جس پر اسےگرفتار کر لیا گیا۔ پشاور کے ایک سینئر پولیس افسر طاہر ایوب کے مطابق یہ مسافر اسلام آباد جانے کا ارادہ رکھتا تھا۔ امریکی سفارتخانے کے مطابق ان کے اہلکار کو سفارتی استثناء حاصل ہے اور وہ پاکستانی حکام سے رابطے میں ہیں۔

امریکی کریڈٹ ریٹنگ ایجنسی موڈیز نے چھ یورپی ریاستوں کی کریڈٹ ریٹنگ کم کر دی ہے۔ ان میں اٹلی، پرتگال، اسپین، مالٹا ، سلوواکیہ اور سلووینہ شامل ہیں۔ موڈیز کے مطابق فرانس، برطانیہ  اور آسٹریا کی صورتحال بھی حوصلہ افزاء نہیں ہے اس وجہ سے ان ممالک کی  ٹرپل اے ریٹنگ میں   کمی کی جا سکتی ہے۔ موڈیز نے کہا کہ یورو زون کا بحران اور یورپ  کے غیر مستحکم مالی حالات اس کی وجہ ہیں۔ تاہم جرمنی کی کریڈٹ ریٹنگ کو اس تناظر میں ابھی تک کوئی خطرہ نہیں ہے۔

لگسمبرگ کے وزیر خزانہ لک فرائیڈین کا کہنا ہے کہ اگر یونان منظور کردہ بچتی اصلاحات پر عمل نہیں کر سکتا تو یورو زون گروپ یونان کے بغیر ہی چلتا رہے گا۔ انہوں نے یہ بات واشنگٹن میں ایک کانفرنس سے خطاب کرتے ہوئے کہی۔ یورپی یونین کے وزرائے خزانہ کا ایک اہم اجلاس بدھ کو ہو رہا ہے، جس میں یونان کو ایک سو تیس بلین یورو کا بیل آؤٹ دینے یا نہ دینے کے بارے میں فیصلہ کیا جائے گا۔ یونانی پارلیمان کی جانب سے بچتی منصوبے کی منظوری کے بعد ملک میں زبردست احتجاجی مظاہرے دیکھے گئے۔

جرمن وزیر خارجہ گیڈو ویسٹر ویلے لاطینی امریکی ممالک کے اپنے دورے کی پہلی منزل برازیل پہنچ گئے ہیں۔ دارالحکومت پہنچنے پر انہوں نے کہا کہ برازیل جنوبی امریکی ممالک کی مرکزی اقتصادی طاقت ہے۔ برازیل کے اپنے ہم منصب انٹونیو پیٹریوٹا سے ملاقات کے بعد ویسٹر ویلے کا مزید کہنا تھا کہ اس وقت برازیل دنیا کی چھٹی بڑی معاشی طاقت بن چکا ہے اور جرمنی اس ترقی سے بہت متاثر ہے۔ ان کے بقول دونوں ملکوں کے مابین  سیاسی اور اقتصادی روابط کو مزید فروغ دیا جائے گا۔ جرمنی اور برازیل نے یورپی یونین اور لاطینی امریکی ممالک کی تنظیم کے مابین آزاد تجارت کے معاہدے کی بھی تائید کی۔ جرمن وزیر خارجہ اپنے آٹھ روزہ دورے کے دوران پیرو، پاناما اور میکسیکو بھی جائیں گے۔

 دہشت گرد گروہ القاعدہ کے برطانیہ میں قید شدت پسند رہنما ابو قتادہ کو رہا کر دیا گیا ہے۔ عدالت نے اپنے فیصلے میں کہا ہے کہ ابو قتادہ کو بغیر مقدمے کےحراست میں رکھنا غیر قانونی ہے۔ اردن سے تعلق رکھنے والے ابو قتادہ کو یورپ میں اسامہ بن لادن کا دایاں ہاتھ بھی کہا جاتا تھا۔ یورپی کورٹ آف ہیومن رائٹس کا اس حوالے سے کہنا تھا کہ یہ حراست غیر قانونی ہے اور برطانیہ کو چاہیے کہ وہ ابو قتادہ کو اردن نہ بھیجے۔ سات یورپی ججوں کی رائے تھی کہ اردن میں قتادہ کے مقدمے کی آزادانہ تحقیقات نہیں ہو سکیں گی اور وہاں اس پر تشدد بھی کیا جا سکتا ہے۔ ابو قتادہ القاعدہ سے تعلق کی تردید کرتے ہیں۔

شمالی کوسووو میں سربیا سے مزید قریبی روابط رکھنے سے متعلق مرحلہ وار ریفرنڈم شروع ہو گیا ہے۔  منگل اور بدھ  کو منعقد ہونے والے ریفرنڈم میں اس خطے میں آباد 35 ہزار سربیئن باشندے اپنا حق رائے دہی استعمال کریں گے، تاکہ اس آبادی کو مکمل طور پر شمالی  کوسووو میں شامل ہونے سے روکا جاسکے۔ سربیا کی حکومت اپنے سابقہ صوبے کوسووو کی خود مختاری کو تسیلم نہیں کرتی۔ بلغراد حکومت نے شمالی کوسووو کے سربیئن باشندوں کے ریفرنڈم کو یورپی یونین کی جانب سے ممکنہ تنقید کی وجہ سے مسترد کر دیا ہے۔ بلغراد کو خدشہ ہے کہ اس طرح مارچ کے آغاز میں سربیا کی یورپی یونین میں شمولیت کے  معاملے کو طول بھی دیا جاسکتا ہے۔

جنوب مغربی چین میں ایک اور بدھ بھکشو نے خود سوزی کی کوشش کی ہے۔ انسانی حقوق کی تنظیموں کے مطابق بیجنگ حکومت کے خلاف احتجاج کرتے ہوئے بھکشو نے خود پر پٹرول چھڑک کر آگ لگا لی۔ یہ واقعہ سیچوان صوبے کے ’آبا‘ شہر میں ایک ایسے وقت میں پیش آیا، جب آج چینی نائب صدرژی جنِپنِگ اور امریکی صدر باراک اوباما واشنگٹن میں ملاقات کرنے والے ہیں۔ تبت میں 2008ء سے صورتحال انتہائی کشیدہ ہے۔ گزشتہ ایک برس کے دوران چینی حکومت کے خلاف احتجاج کرتے ہوئے تقریباً بیس تبتی باشندے آگ لگا کر خود کشی کر چکے ہیں۔