قزاقستان کے صدر نور سلطان نذربائیف کے دورہء جرمنی کے دوران جرمن کمپنیوں نے قزاقستان کے ساتھ اربوں یورو کے پچاس معاہدے تشکیل دیے۔ وسطی ایشیائی ریاست قزاقستان کے صدر نور سلطان نذربائیف نے جب جرمن دارالحکومت برلن میں چانسلر انگیلا میرکل سے ملاقات کی تو دوران ملاقات جرمن قائد حکومت نے قزاقستان میں انسانی حقوق کی صورت حال کے بارے میں اپنی تشیوش سے مہمان صدر کو آگاہ کیا۔ دونوں لیڈروں نے ملاقات کے بعد ایک مشترکہ نیوز کانفرنس سے بھی خطاب کیا۔ اس خطاب میں قزاقستان اور جرمن اقتصادی تعلقات پر لیڈروں نے اظہار خیال بھی کیا۔ نیوزکانفرنس میں انگیلا میرکل نے قزاقستان اور یورپی یونین کے درمیان پارٹنرشپ معاہدے کی حمایت کا بھی اعلان کیا۔

پاکستانی سپریم کورٹ وزیراعظم سید یوسف رضا گیلانی کی جانب سے توہین عدالت کے فیصلے کے خلاف اپیل کی سماعت آج جمعرات کو کر رہی ہے۔ سپریم کورٹ کی جانب سے جاری کردہ بیان کے مطابق چیف جسٹس افتخار محمد چوہدری کی سربراہی میں آٹھ رکنی بینچ  انٹرا کورٹ اپیل کی سماعت کرے گا۔ وزیراعظم کی جانب سے دائر کی گئی اپیل میں عدالت سے استدعا کی گئی ہے کہ وہ وزیراعظم کے خلاف فرد جرم عائد کرنے کے فیصلے کو منسوخ کرتے ہوئے وزیراعظم کو جاری کیا گیا اظہار وجوہ کا نوٹس واپس لیا جائے۔ مزید یہ کہ اپیل کا فیصلہ ہونے تک وزیراعظم کے خلاف توہین عدالت کی کارروائی معطل کر دی جائے۔

افغانستان سے ملحق پاکستانی قبائلی علاقے میں جمعرات کی علی الصبح ہوئے مبینہ امریکی ڈرون حملے میں کم ازکم چار مشتبہ جنگجو مارے گئے ہیں۔ مقامی ذرائع کے مطابق شمالی وزیرستان کے صدر مقام میران شاہ میں واقع ایک کمپاؤنڈ پر دو میزائل داغے گئے۔ مزید تفصیلات ابھی موصول ہو رہی ہیں۔ سیکورٹی ذرائع نے بھی اس حملے کی تصدیق کی ہے۔ بدھ کو بھی پاکستانی قبائلی علاقے پر کیے گئے ایک مبینہ امریکہ ڈرون حملے میں دس جنگجو مارے گئے تھے۔

یونان کی اتحادی حکومت نئے بچتی اقدامات متعارف کروانے کے حوالے سے جاری مذاکرات پر تعطل کا شکار ہے۔ یورپی یونین، یوروپین سینٹرل بینک اور عالمی مالیاتی ادارے کی طرف سے مالی امدادی پیکج کےحصول کے لیے نئے بچتی اقدامات ناگزیر ہیں۔ نئے منصوبے کے مطابق حکومتی ملازمین کی تنخواہوں میں کم ازکم بیس فیصد کی کمی اور پیبلک سیکٹر میں پندرہ ہزار ملازمتیں ختم کرنا شامل ہیں۔ یورو زون کے وزرائے خزانہ آج جمعرات کو برسلز میں ملاقات کریں گے، جس میں یونان کی صورتحال پر غور کیا جائے گا۔ دریں اثناء یونان میں بچتی منصوبہ جات کے خلاف عوامی سطح پر احتجاج کا سلسلہ جاری ہے۔

مالدیپ میں صدر محمد نشید کے مستعفی ہونے کے بعد سیاسی بحران مزید شدت اختیار کر گیا ہے۔ محمد نشید نے اپنے مستعفی ہونے کو بغاوت قرار دیا ہے۔ مالدیپ میں پیدا شدہ سیاسی بحران کی شدت محسوس کرتے ہوئے امریکہ نے اپنا خصوصی ایلچی مالے روانہ کرنے کا اعلان کیا ہے۔ امریکہ کے نائب وزیر خارجہ رابرٹ بلیک مالدیپ کے دارالحکومت پہنچ کر صورت حال کا جائزہ لینے کے علاوہ حکومتی اہلکاروں سے ملاقاتیں بھی کریں گے۔ جمہوری طور پر منتخب ہونے والے پہلے صدر  محمد نشید کے منگل کے روز مستعفی ہونے کے بعد بدھ کے روز ہونے والے حکومت مخالف مظاہروں میں کم از کم تیس افراد کے زخمی ہونے کو رپورٹ کیا گیا ہے۔

صومالیہ میں الشباب کے جنگجوؤں نے دارالحکومت میں ہوئے اس بم دھماکے کی ذمہ داری قبول کر لی ہے، جس میں کم ازکم نو افراد مارے گئے تھے۔ موغا دیشو میں واقع ایک ہوٹل میں ہوئے اس بم دھماکے کے نتیجے میں درجنوں افراد زخمی بھی ہوئے، جن میں دو ممبر پارلیمان بھی شامل ہیں۔ دوسری طرف یورپی یونین نے صومالیہ کی مالی امداد روکنے کی دھمکی دی ہے۔ یورپی یونین صومالیہ میں سیاسی اصلاحات کا مطالبہ کر رہی ہے۔ صومالیہ کے سب سے بڑے ڈونر یورپی یونین کے قرن افریقہ کے لیے خصوصی مندوب الیگزینڈر رونڈوس نے روئٹرز کو بتایا ہے کہ یونین صومالیہ کے سیاسی نظام میں تبدیلی کی سست رفتار پر تحفظات رکھتی ہے۔

فرانس میں پائلٹوں کی تین روزہ ہڑتال کے نتیجے میں بدھ کو بھی فضائی سفر بری طرح متاثر ہوا۔ ایئر فرانس کے بقول اس ہڑتال کی وجہ سے طویل سفر والی چالیس فیصد پروازیں جبکہ مختصر سفر والی تیس فیصد پروازیں منسوخ کرنا پڑیں۔ یہ ہڑتال اس بل کے خلاف کی گئی ہے، جس کے مطابق ایئر لائن کے ملازمین ہڑتال سے اڑتالیس گھنٹے پہلے نوٹس جمع کروانے کے پابند ہوں ہیں۔

انگلش قومی فٹ بال ٹیم کے منیجر فابیو کاپیلو نے اپنے عہدے سے استعفیٰ دے دیا ہے۔ بدھ کی رات فٹ بال ایسوسی ایشن کی طرف سے جاری کیے گئے ایک بیان میں کہا گیا ہے کہ اٹلی سے تعلق رکھنے والے کاپیلو فوری طور پر اپنی ذمہ داریوں سے سبکدوش ہو گئے ہیں۔ 2007ء سے انگلش فٹ بال  ٹیم کے منیجر کاپیلو اور انگلینڈ میں فٹ بال کے منتظم ادارے کے ساتھ اس وقت اختلافات پیدا ہو گئے تھے، جب جان ٹیری کو انگلش قومی فٹ بال ٹیم کے کپتان کے عہدے سے الگ کیا گیا تھا۔

جرمن کپ کے کوارٹر فائنل  مقابلوں میں  ڈورٹمنڈ ،  مؤنشن گلاڈ باخ ، بائرن میونخ اور  گروئتھر فوئرتھ نے کامیابی حاصل کر لی ہے۔ جرمن کپ کے تین کوارٹر فائنل مقابلے بدھ کو کھیلے گئے، جن میں مؤنشن گلاڈ باخ کی ٹیم نے  برلن کے ہیرتھا کلب کو دو گول سے شکست دی جبکہ جرمنی کے تاریخ ساز فٹ بال کلب بائرن میونخ نے اشٹٹ گارٹ کو دو گول سے ہرایا۔ ہوفن ہائیم کی ٹیم سیکنڈ ڈویژن میں کھیلنے والی ٹیم گروئتھر فوئرتھ (Greuther Fuerth) سے ایک گول سے ہار گئی۔ جرمن کپ کا ایک کوارٹر فائنل منگل کے روز کھیلا گیا تھا۔ اس میں بنڈس لیگا کی دفاعی چیمپئن ڈورٹمنڈ نے ہولشٹائن کیل کو چار گول سے ہرایا۔