1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዜና | 31.03.2015 | 17:20

ካምፓላ፤ አቃቢተ ሕጓ በጥይት ተገደሉ

በጎርጎሪዮሳዊዉ 2010ዓ,ም በካምፓላ ዩጋንዳ የደረሰዉን የአሸባሪ ጥቃት በፍርድ ቤት የሚከታተሉት አቃቢተ ሕግ በጥይት ተገደሉ። የዩጋንዳ ፖሊስ ቃል አቀባይ ፓትሪክ ኦንያንጎ ለዜና ወኪሎች እንደገለፁት፤ አቃቢተ ሕግ ጆአን ካጌዚ ትናንት ከሥራ ወደቤታቸዉ በተሽከርካሪያቸዉ እየተጓዙ ሳለ ነዉ በሞተር ሳይክል ላይ በነበሩ ታጣቂዎች ጥይት የተመቱት። ከአምስት ዓመታት በፊት ካምፓላ ዉስጥ የዓለም ዋንጫን በቴሌቭዥን ይከታተሉ በነበሩበት ስፍራ የደረሰዉ ፍንዳታ የ76 ሰዎች ሕይወት ጠፍቷል። ካጌዚ በድርጊቱ የተጠረጠሩ 13 ሰዎችን ጉዳይ ለፍርድ ቤት አቅርበዋል። ከተከሳሾቹ አብዛኞቹም የሶማሊያ ተወላጆች የሆኑ የኬንያና ታንዛንያ ዜጎች ናቸዉ። በወቅቱም ለጥቃቱ የሶማሊያዉ እስላማዊ ፅንፈኛ ቡድን አሸባብ ኃላፊነት ወስዷል።  የለዚህም ግድያ የተጠረጠረዉ ይኸዉ ቡድን ነዉ። ከግድያዉ በኋላም በካምፓላ የዩናይትድ ስቴትስ ኤምባሲ ምዕራባዉያን ዜጎች በሚያዘወትሯቸዉ አካባቢዎች አሸባሪዎች ጥቃት ለማድረስ አቅደዋል ሲል አስጠንቅቋል።

ቴህራን፤ ኢራንና የሳዉዲ የመን ጥቃት

ሳዉድ አረቢያ የመን ላይ የምትሰነዝረዉ ጥቃት አካባቢዉን ሁሉ አደጋ ላይ እንዳይጥል ስትል ኢራን አስጠነቀቀች። በሺያት አማፅያን ላይ የሚካሄደዉን ወታደራዊ ዘመቻም ባስቸኳይ እንዲቆም ጥሪ አቀረበች። የኢራን ምክትል የዉጭ ጉዳይ ሚኒስትር ሁሴን አሚር አብዱላሂያኒ፤ በዚያ አካባቢ ከየትኛዉም ወገን ቢሆን የሚለኮስ የጦርነት እሳት፤  ሃገራቱን በሙሉ በእሳት እንዲጫወቱ የሚስብ እንደሚሆን አመልክተዋል። አብዱላሂኒ አያይዘዉም ሀገራቸዉ ለየመን የጦር ኃይልን እንደ መፍትሄ መጠቀምን አጥብቃ እንደምትቃወም በመግለፅም፤ ሳዉዲ የመን ላይ የምትወስደዉ ወታደራዊ ርምጃ ከባድ ስህተት መሆኑን እንደምታምንም ለጋዜጠኞች አስረድተዋል። ለፖለቲካዊ መፍትሄ መንገድ ለመክፈትም ወታደራዊዉ ዘመቻዉ ባስቸኳይ መቆም እንደሚኖርበት ገልጸዋል። የሳዉዲ የዉጭ ጉዳይ ሚኒስትር ሳዑድ አል ፋይሳል በተቃራኒዉ የሀገራቸዉ መሪዎች የጦርነት ጥማት እንደሌላቸዉ በመግለጽ፤ ኢራን የመንን የሚያተራምሱትን የሺያት አማፅያን መደገፏን አዉግዘዋል።

አቡጃ፤ የናይጀሪያ ተቃዋሚ መሪ አሸነፉ

ናይጀሪያ ዉስጥ በተካሄደዉ ምርጫ የቀድሞዉ አምባገነን ወታደራዊ መሪ ጀነራል ሙሀማዱ ቡሃሪ አሸናፊ መሆናቸውን ሮይተርስ ዘገበ። ቃል አቀባያቸዉ ጋርባ ሼሁ ለአሶስየትድ ፕረስ እንደገለፁት ቡሃሪ ቢያሸንፉም ስልጣን ላይ የሚገኘዉ መንግሥት ሊያጭበረብር ይችላል የሚል ስጋት አላቸዉ።  ምርጫ ከተካሄደባቸዉ 36 ግዛቶች በሰባቱ ብቻ በታየዉ ዉጤት እንኳ ቡሃሪ በሰፊ ነጥብ እየመሩ መሆኑ ተገልጿል። እንደተባለዉ ቡሃሪ ድላቸዉ ተረጋግጦ ፕሬዝደንት ጉድላክ ጆነተን ሳያንገራግሩ የሚወርዱ ከሆነ በናይጀሪያ ታሪክ ተቃዋሚ ፓርቲ በስልጣን ላይ የሚገኝ ገዢ ፓርቲን በዴሞክራሲያዊ ምርጫ ሲያሸንፍ የመጀመሪያዉ ይሆናል። አኹን በደረሰን ዜና መሠረት ፕሬዚዳንት ጉድላክ ጆናታን በምርጫው አሸናፊ ለሆኑት የተቃዋሚ መሪ  ጀነራል ሙሀማዱ ቡሃሪ  የእንኳን ደስ አሎት መልእክት አስተላልፈዋል።

ዋሽንግተን፤ መሳሪያ የያዘ እስረኛ ማምለጡ

የአሜሪካን ፖሊስ ከሰሜን ቨርጂንያ ሃኪም ቤት መሳሪያ ይዞ ያመለጠ እስረኛን ለመያዝ መሰማራቱ ተሰማ። ወሰን አሳየ በሚል ስም የተገለፀዉ እስረኛ የባንክ ዘረፋ ለመፈፀም ሲል ተይዞ እስር ላይ መቆየቱን እና ራሱን ለማጥፋት ሲሞክር ተደርሶበትም ሃኪም ቤት መግባቱን ሮይተርስ ከዋሽንግተን ዘገቧል። የሃኪም ቤት ልብስ እንደለበሰ ከግቢዉ ለመዉጣት የጠባቂዉን መሳሪያ መንጠቁ የተገለፀዉ ተፈላጊ መኪና ሰርቆ ማምለጡን ፖሊስ ገልጿል። በወቅቱም ጥይት ቢተኩስም በተኩሱ የተጎዳ አለመኖሩ ተመልክቷል። መጀመሪያ ያመለጠበትን ተሽከርካሪ ሳይቀይር እንዳልቀረ ያመለከተዉ ፖሊስ ተፈላጊዉ ግለሰብ ከሴት ጓደኛዉ ጋ ሳይሆን አይቀርም ብሏል። ግለሰቡ በሰሜን ቨርጂኒያ ዉስጥ በተፈፀሙ 11 የባንክ ዘረፋዎች ተጠርጣሪ መሆኑን ዘገባዉ ጨምሮ ገልጿል። እሱን ለመያዝም በርካታ የፖሊስ ኃይል ተሰማርቷል። 

ባግዳድ፤ የኢራቅ ኃይሎች ቲክሪትን ሊይዙ ነዉ

በአሜሪካን መራሹ የአየር ጥቃት የሚታጀቡት የኢራቅ ወታደሮች ሰሜናዊቱን ስልታዊ ከተማ ቲክሪትን ዳግም ለመቆጣጠር እየተቃረቡ መሆኑን የጀርመን የዜና ወኪል ዘገበ። እንደዘገባዉ ወታደሮቹ ዛሬ እራሱን እስላማዊ መንግሥት በሚለዉ ፅንፈኛ ቡድን ቁጥጥር ሥር የነበሩ ሌሎች በርካታ ወረዳዎችንም መልሰዉ ለመያዝ እየገፉ ነዉ። አንድ ወታደራዊ መኮንን እንደገለፁትም፤ የመንግሥት ኃይሎች በማዕከላዊ ቲክሪት የሚገኙትን አል ዙሁር፤ አል ሲናይ እና አል ቃዲያሲን የተሰኙትን አካባቢዎች ከፅንፈኛ ታጣቂዉ ቡድን ነፃ አዉጥተዋል። በተካሄደዉ ዉጊያም በርካታ የቡድኑ አባላት መገደላቸዉን፤ ከመንግሥት ወገንም ዘጠኝ ወታደሮች መሞታቸዉንም ማንነታቸዉ እንዳይገለጽ ያሳሰቡት የዜናዉ ምንጭ ጠቁመዋል። በተያያዘ ዜና ቡልጋሪያ ዉስጥ ዛሬ እስላማዊ መንግሥት ነኝ የሚለዉን ቡድን በመደገፍ የተጠረጠሩ ስድስት ሰዎች መታሰራቸዉን የፈረንሳይ የዜና ወኪል ዘገበ። ለሌሎች ሁለት ተጠርጣሪዎችም የእስራት ማዘዣ ተሰጠ። የሀገሪቱ አቃቤ ሕግ ባወጣዉ መግለጫ፤ ስምንቱ ተጠርጣሪዎች ፅንፈኛዉን ቡድን በመደገፍና ፀረ ዴሞክራሲ ርዕዮተ ዓለም በመስበክና ስለጦርነት በመቀስቀስ ክስ መስርቶባቸዋል።

ኩየት፤ ለሶሪያ የሰብዓዊ እርዳታ 1,6 ቢሊዮን ዩሮ ቃል ተገባ

ኩየትና የአዉሮጳ ኅብረት ጦርነት ያዳቀቃት የሶርያን የሰብዓዊ ቀዉስ ይዞታ ለመለወጥ 1,6 ቢሊዮን ዩሮ እንደሚለግሱ ዛሬ አስታወቁ። ለሶርያ ርዳታ ለማሰባሰብ ዛሬ ኩየት ላይ በተካሄደዉ ጉባኤ የተገኙት የተመድ ዋና ፀሐፊ ባን ጊ ሙን በአሁኑ ወቅት ከአምስት ሶርያዉያን አራቱ በከፋ ድህነት ኑሯቸዉን እየገፉ እንደሚገኙ አመልክተዋል። ስብሰባዉን በንግግር የከፈቱት የኩየት አሚር ሼይክ ሳባህ አል አህመድ አል ሳባህ በበኩላቸዉ፤ በዛሬዉ ዕለት የተሰባሰቡት ወገኖች በሰዉ ልጅ ታሪክ የደረሰዉን ታላቅ ሰብዓዊ ቀዉስ ለመታደግ መሆኑን ገልፀዋል። የዓለም ኃያላንም አምስት ዓመታት ላስቆጠረዉ የሶርያ የእርስ በርስ ጦርነት ፖለቲካዊ መፍትሄ እንዲፈልጉ ጥሪ አቅርበዋል። ይህ በእንዲህ እንዳለም የስፓኝ ፖሊስ ልጆቻቸዉን ወደሶርያ ሊልኩ አቅደዋል ያላቸዉን ቤተሰቦችን ማሰሩን የስፓኝ የሀገር ዉስጥ ሚኒስቴር አስታወቀ።  የ16 ዓመት መንትዮች መሆናቸዉ የተገለፀዉን ሁለቱን ልጆችም ባርሴሎና አቅራቢያ በሚገኝ ስፍራ መያዙን ፖሊስ አመልክቷል። ትዉልደ ሞሮኮ መሆናቸዉ የተገለፀዉ የልጆቹ ቤተሰቦች እዚያ ከሚገኝ የአሸባሪ ቡድን ጋ ግንኙነት በመፍጠር ልጆቻቸዉን ለሽብር ዉጊያ እንዲመለመሉ አመቻችተዋል ተብሏል። የልጆቹ ታላቅ ወንድ ባለፈዉ ዓመት ሶርያ ዉስጥ የሽብር ተግባር ሲፈፅም መገደሉን ዘገባዉ ጨምሮ ገልጿል።

 

በርሊን፤ ጠንካራ አዉሎ ንፋስና ወጀብ

ከትናንት ሌሊት አንስቶ ጀርመን በገጠማት ጠንካራ አዉሎ ንፋስና ወጀብ የባቡር እንቅስቃሴዎች ጭምር መደናቀፋቸዉ እየተነገረ ነዉ። ዛክሰንአንሃልት በተሰኘዉ ግዛት ዉስጥም አዉሎ ነፋሱ የጣለዉ ሕንፃም የአንድ ሰዉ ሕይወት አጥፍቷል። ጠንካራዉ አዉሎ ነፋስ የገነደሳቸዉ ትላልቅ ዛፎች ከፓሪስ ቡዳፔስት እንዲሁም ከሙኒክ ወደአዉግስቡርግ  የሚያልፉትን የባቡር መስመሮች አገልግሎት አሰናክሏል። የጀርመን የባቡር አገልግሎት ድርጅት ዶቼ ባን በተለይ በኖድርራይን ቩስትፋለን ፌደራል ግዛት ከቀኑ አምስት ሰዓት ጀምሮ የባቡር እንቅስቃሴዉ እንዲቆም አድርጓል። የጀርመን የሜትሪዮሎጂ ባለሙያዎች ኒክላስ የሚል መጠሪያ የሰጡት ከባድ አዉሎ ነፋስ በሰዓት 150 ኪሎ ሜትር የሚምዘገዘግ ነዉ። እንዲያም ሆኖ ባለፈዉ ጥቅምት ወር አዉሮጳ ዉስጥ ከባድ ጉዳት ካደረሰዉ አዉሎ ነፋስ አንፃር ሲታይ በመጠኑ ደካማ ሊባል የሚችል ነዉ ተብሏል። ሆኖም ግን 40 በረራዎችን ማዘግየቱና ማሰረዙ ተነግሯል። 

SL/MS