1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዜና | 18.04.2015 | 17:14

ዚምባብዌ፤ ሙጋቤ የደቡብ አፍሪቃዉን ጥቃት ተቃወሙ

የወቅቱ የአፍሪቃ ሕብረት ሊቀመንበርና የዚምባቢ ፕሬዚዳንት ሮበርት ሙጋቤ በጎረቤት ደቡብ አፍሪቃ ባለፈዉ ሁለት ሳምንት ጀምሮ ስደተኛ አፍሪቃዉያን ላይ እየደረሰ ያለዉን ዘግናኝ ጥቃት በጥብቅ አወገዙ። መዲና ሃራሪ ዉስጥ በሚገኘዉ ብሔራዊ ስቴድየም ተገኝተዉ ባደረጉት ንግግር በጥቃቱ መደንገጣችንና መፀየፋችንን መግለፅ እወዳለሁ ነዉ ያሉት። ሙጋቤ ይህ የመጤ ጥላቻ ዳግም መከሰት የለበትም ብለዋል። በሌላ በኩል የደቡብ አፍሪቃዉ ፕሬዚዳንት ጃኮብ ዙማ ወደ ኢንዶኔዥያ ሊያደርጉት ያቀዱትን ጉዞ ሰርዘዉ በስደተኞችና በሌሎች የዉጭ ዜጎች ላይ የሚደርሰዉን ጥቃት ወጀብ ለመፍታት እንደሚሰሩ ተዘግቧል።  ከሰላሳ በላይ ጥቃት አድራሾች ትናንት ለዛሬ አጥብያ በጆሃንስበርግ አካባቢ መያዛቸዉም ተያይዞ ተዘግቧል።    

ጀርመን፤ ከየመን ከ100 በላይ አዉሮጳዉያንን አወጣች

የጀርመን ፊደራል መንግሥት ጀርመናዉያንን ጨምሮ ከ100 በላይ ሰዎችን በእርስ በርስ ጦርነት ከተዘፈቀችው የመን ማዉጣቱ ተዘገበ። የጀርመን መንግሥት ጀርመናዉያንንና በርካታ የአዉሮጳ ሕብረት ሃገራት ተወላጆችን እንዲሁም  የመናዉያን የቤተሰብ አባሎቻቸዉን ከየመን ወደ ጅቡቲ ያጓጓዘዉ በአንድ የዮርዳኖስ አዉሮፕላን መሆኑንና ከጅቡቲ ወደ የሃገራቸዉ እንደሚመለሱም የጀርመን የዉጭ ጉዳይ ሚኒስቴር መሥራያ ቤት አስታዉቋል። እስከ ቅርብ ጊዜ ድረስ በየመን ሰማንያ ያህል ጀርመናዉያን መቅረታቸዉ ይታወቅ ነበር። እንድያም ሆኖ ምን ያህል ጀርመናዉያን ከየመን ለቀዉ እንደወጡ ግን የጀርመኑ የዉጭ ጉዳይ ሚኒስቴር መሥራያ ቤት የገለፀዉ ነገር የለም። በየመን የሺአ ሁቲ ሚሊሽያዎች ከሃገር ከወጡት ከፕሬዚዳንት ኧቤዶ ራቦ ማንሱር ሃዲ ደጋፊዎች ጋር ዉጊያ መጀመራቸዉ ይታወቃል። ይህን ተከትሎ ከሳምንታት በፊት በሳዉድ አረብያ የሚመራ ጥምር የአየር ኃይል ጦር የሁቲ አማፅያን የጦር ሰፈሮችን በቦንብ በመደብደብ ላይ ይገኛል።

በሌላ በኩል፤ የኢራን ፕሬዚዳንት ሃሳን ሮሃኒ ሳዉዲ በየመን በሁቲ ሚሊሽያ ላይ የጀመረችዉን ዘመቻ እንድትገታ በድጋሚ ጠየቁ። ፕሬዚዳንቱ በቴህራን በተደረገ አንድ ወታደራዊ ሰልፍ ትዕይንት ላይ እንደተናገሩት ሳዉዲ አረብያ በዚህ ድርጊትዋ ለሳዉዲ ዜጎች ከጥፋት በስተቀር አካባቢዉን የመቆጣጠር ስልጣን አታመጣላቸዉም ሲሉ ተናግረዋል።

ናይጀርያ ፤የቦኮ ሃራም ጥቃት

የቦኮ ሃራም ሚሊሽያዎች በሰሜናዊ ናይጀርያ ቢያንስ የ10 ሰዎችን ጎሮሮ መቁረጣቸዉን የአይን እማኞች መናገራቸዉ ተዘገበ። ይህ የሆነዉ የመንግሥት ወታደሮች አካባቢዉ ላይ የሚገኙትን ነዋሪዎች ወደሌላ መኖርያ ለማዛወር ጥረት በማድረግ ላይ ሳሉ ነዉ። በዓመቱ መጀመርያ አብዛኛዉን አካባቢ ተቆጣጥሮ የነበረዉ እስላማዊዉ ጽንፈኛ ቡድን ቦኮ ሃራም ከቦታዉ መባረሩ ይታወቃል። ይህ በእንዲህ እንዳለ በናይጀርያ ድንበር አኳያ በካሜሩን አንድ ገጠር ዉስጥ ቦኮሃራም 10 ሲቪሎችን መግደሉ ታዉቋል። 


አዉስትራሊያ፤ 5 ተጠርጣሪ አሸባሪዎችን ያዘች

የአዉስትራሊያ ፖሊስ በሜልበርን ከባድ ጥቃት ለመጣል አቅደዋል በሚል አምስት ወጣት ወንዶችን መያዙን አስታወቀ። ተጠርጣሪዎቹ በ18 እና በ19 ዓመት እድሜ ክልል የሚገኙ ወጣቶች ሲሆኑ፤ ራሱን «እስላማዊ መንግሥት» ብሎ በሚጠራዉ ቡድን  የተነሳሱ ናቸው ሲል የሀገሪቱ ፖሊስ አስታውቋል። ተጠርጣሪዎቹ ጥቃቱን ለመጣል ያቀዱት የዛሬ ሣምንት ሚያዝያ 17 ቀን አዉስትራሊያ ከ100 ዓመት በፊት በቱርክ ጋሊፖሊ ላይ የተካሄደዉን ደም አፋሳሽ ጦርነት በምታስብበት ዝግጅት ላይ እንደነበር ተዘግቧል። ሚያዝያ 17 አዉስትራሊያ የመጀመርያዉን የዓለም ጦርነት የተቀላቀችበት ቀን ነዉ። አዉስትራልያና ኒዉዚላንድ እንደ ጎርጎሪዮሣዊው አቆጣጠር ሚያዝያ 25 ቀን፣ 1915 ዓ.ም የኦስማን ግዛትን በመቃወም በቱርክ ልሳነ-ምድር ጋሊፖሊን ለመያዝ ከፍተኛ ዉጊያ አካሂደዉ ነበር።  በመጀመርያዉ ቀን በዚህ ዉጊያ ከ11 ሺህ የሚበልጡ ወታደሮች መሞታቸዉ ይታወሳል።

ጀርመን፤ የዩኤስ አሜሪካ የሰዉ ዓልባ አዉሮፕላኖች መነሻ

ዩኤስ አሜሪካ በሰዉ ዓልባ አዉሮፕላኖች ጦርነት የምታካሂደዉ ከጀርመን መሬት በመነሳት መሆኑን የመገናናኛ ብዙኃን ዘገቡ። «ሽፒግል» የተሰኘዉ የጀርመን ጋዜጣ እንዳስነበበዉ ዩኤስ አሜሪካ በሰዉ ዓልባ አዉሮፕላንዋ በአፍሪቃና በቅርብ እስያ ሃገራት በፈፀመቻቸዉ ግድያዎች  የሰዉ ዓልባ አዉሮፕላኖችዋን ያስነሳቻቸዉ በጀርመን ራይንላንድ ፓላቲኔት ከሚገኘዉ «ራምሽታይን» ከተሰኘዉ የአየር ኃይሏ መሆኑን «The Intercept» የተሰኘዉን የምርመራ ገጽ ዋቢ በማድረግ ጋዜጣዉ ዘግቧል።  የጀርመን ፊደራል መንግሥት የ«ራምሽታይን» ተግባርን እንደሚያውቅም ተያይዞ ተጠቅሷል። ዩኤስ አሜሪካ ሰዉ ዓልባ አዉሮፕላንዋን ተጠርጣሪ አሸባሪዎችን አድኖ ለመግደልም የምትጠቀምበት ሲሆን እስካሁን በየመን፤ በፓኪስታን፤ በኢራቅ፤ በሶማልያ እና በአፍጋኒስታን አሉ ያለቻቸዉን የሽብር ተጠርጣሪዎች መግደልዋ ይታወቃል።

ግሪክ፤ በቢሊዮን የሚቆጠር ይሮ ከቻይናና ሩስያ

ግሪክ ከተደቀነባት የኤኮኖሚ ክስረት ለመዉጣት ከቻይና እና ከሩስያ ገንዘብ የምታገኝበትን መንገድ እያፈላለገች መሆኑዋን የመገናኛ ብዙኃኖች ዘገቡ። አቴንስ የሚገኘዉን የግሪክ መንግሥትን  ዋቢ በማድረግ «አጎራ» እና «ካርፊ» የተሰኙ ሁለት የግሪክ የሰንበት ጋዜጦች  እደዘገቡት  የፔኪንጉ መንግሥት የግሪክን የፒሬዩስ ወደብ ለመገልገልና፤ የግሪኩን የምድር ባቡር ለመቀላቀል ለግሪክ መንግሥት 10 ቢሊዮን ዪሮ የቅድምያ ክፍያ ሊሰጥ ይችላል። በሌላ በኩል የግሪክ መንግሥት ከሩስያ ከሶስት እስከ አምስት ቢሊዮን ዩሮ እንደሚያገኝ ተስፋ እንዳለዉም ነዉ የተነገረዉ። እንደ ዘገባዉ ይህ ለግሪክ የሚከፈለዉ ገንዘብ «ተርኪሽ ስትሪም » ለተሰኘዉ ከሩስያ ተነስቶ በቱርክና በግሪክ በኩል ለአዉሮጳ ሃገራት ጋዝ ለሚያስተላልፈዉ አዲስ የጋዝ ማስተላለፍያ የቧንቧ መስመር የቅድምያ ክፍያ ሳይሆን አይቀርም። ይህ ስምምነት እስካሁን ያለዉን ሁኔታ ሊቀይር ይችላል ሲሉ የግሪክ ጥምር መንግሥት የሆነዉ የግራ ፓርቲ አባል ሴሪዛ መናገራቸዉም ድረ-ገፁ አስነብቧል። በአሁኑ ወቅት ግሪክ በቀጣይ ብድር ለማግኘት ከዩሮ ተጠቃሚ ሃገራት ቡድኖችና ከዓለማቀፉ የገንዘብ አበዳሪ ድርጅት ጋር ድርድር ላይ መሆንዋ ይታወቃል። 

አፍጋኒስታን፤ ቢያንስ 33 ሰዎች በአጥፍቶ ጠፊ ተገደሉ

በምስራቃዊ አፍጋኒስታን ጃላላባድ ከተማ አንድ አጥፍቶ ጠፊ በጣለዉ ጥቃት ቢያንስ 33 ሰዎች ተገደሉ፤ ሌሎች ወደ 100 የሚሆኑ  ሰዎች ደግሞ መቁሰላቸዉን በጀላላባድ ከተማ የሚገኝ ሆስፒታል ተጠሪ ገለፁ። ጥቃቱ የተጣለዉ በአንድ የባንክ ቅርንጫፍ መሥርያ ቤት ደምወዛቸዉን ለመዉሰድ በተሰለፉ ሰዎች መሃል እንደሆነ የከተማዋ ፖሊስ ቃል አቀባይ አስታዉቆአል። የአፍጋኒስታኑ ፕሬዚዳንት አሽራፍ ጋኒ እንዳስታወቁት ለጥቃቱ እራሱን «እስላማዊ መንግሥት» ብሎ የሚጠራዉ  ቡድን ኃላፊነትን ወስዷል። አሸባሪ ቡድኑ እስከ አሁን በአፍጋኒስታን ይኽ ነው በሚባል መልኩ እንቅስቃሴ ሲያደርግ አለመታየቱ ይታወቃል።

ኢትዮጵያ፤ አሰልጣኝ ማሪያኖ ባሬቶ በይፋ ሥራቸዉን ይለቃሉ

የኢትዮጵያ እግር ኳስ ፌዴሬሽን  አሰልጣኝ ማሪያኖ ባሬቶ የሁለት ዓመት የሥራ ኮንትራታቸዉ ከማብቃቱ ከዓመት በፊት ከሁለት ሣምንት ግድም በኋላ፤ ሚያዝያ 22 ሥራቸዉን በይፋ እንደሚለቁ ሮይተርስ የዜና ወኪል የኢትዮጵያ እግር ኳስ ፌዴሬሽን ጠቅሶ ዛሬ ዘገበ። የ58 ዓመቱ ፖርቱጋላዊ ሥራቸዉን እንደሚለቁ በተደጋጋሚ መዘገቡ ይታወቃል። የኢትዮጵያ እግር ኳስ ፌዴሬሽን ለአሠልጣኙ ተጨማሪ የሦስት ወር ደመወዝ እንደሚከፍል፤ ይኽም በውሉ መካተቱን አስታውቋል። ማሪያኖ ባሬቶ ከዚህ ቀደም የጋና ብሔራዊ ቡድን አሰልጣኝ፤ የሩስያዉ የዲናሞ ሞስኮ ክለብ ረዳት አስተዳዳሪ ሆነዉ ካገለገሉ በኋላ ነበር፤ የኢትዮጵያ የዋልያዎቹ አሰልጣኝ ለመሆን ባለፈዉ ዓመት የሁለት ዓመት ኮንትራት የተፈራረሙት።

AH / MS