1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዜና | 17.04.2015 | 17:13

አዲስ አበባ የግልገል ጊቤ የኃይል ማመንጫ ፕሮጀክት ግምገማ

አንድ የተመድ ቡድን ኢትዮጵያ በኦሞ ወንዝ ላይ የምትገነባው የግልገል ግቤ ሶስት የኃይል ማመንጫ ግድብ ፕሮጀክት በተመጋቢው በቱርካና ሐይቅ ላይ ያስከትላል የተባለው ተፅእኖ እንደሚገመግም ተዘገበ ።ለዚሁ ዓላማ የተባበሩት መንግሥታት የትምህርት የሳይንስ ና የባህል ድርጅት «ዩኔስኮ» ልዑካን ኢትዮጵያን እንደሚጎበኙ ፋና ዜና ማሰራጫን ጠቅሶ IPS የተባለው ዜና አገልግሎት ዘግቧል ። ለነባር ህዝብ ህልውና ተቆርቋሪ መሆኑ የሚነገርለት ሰርቫይቫል ኢንተርናሽናል የተባለው ድርጅት በፕሮጀክቱ አካባቢ የሚገኙ ደኖች በመውደማቸው ደቡብ ምዕራብ ኢትዮጵያ ያለው የክዌጉ ህዝብ ለብርቱ ረሃብ እንዳይዳረግ ያሰጋል ሲል አስጠንቅቆ ነበር ። መቀመጫውን ብሪታኒያ ያደረገው ይኽው ድርጅት 90 በመቶ ግንባታው የተጠናቀቀው የግልገል ግቤ 3 ፕሮጀክት ና በአካባቢው የሚካሄደው የመስኖ ልማት የክዌጉዎችን የውሐና የአሳ አቅርቦታቸውን በኃይል ይቀንሳል ሲል ያሳስባል ። UNESCO ከዚህ ቀደም ፕሮጀክቱ ያስከትላል ስለሚባለው ተፅእኖ ግምገማ ለማካሄድ የኢትዮጵያ መንግሥት የግድቡን ግንባታ እንዲያቆም ለማሳመን ሞክሮ አልተሳካለትም። የኢትዮጵያ መንግሥት በወቅቱ የፕሮጀክቱ ግምገማ  የዓለም ባንክ ገንዘብ በሰጠው ዓለም ዓቀፍ አማካሪ ድርጅት መካሄዱን በማስረዳት ጥያቄውን ሳይቀበለው ቀርቷል ።የኢትዮጵያ የውሐ እና ኤነርጂ ሚኒስቴር ሚኒስትር አቶ ዓለማየሁ ተገኑ የግምገማው ውጤት ግድቡ በቱርካና ሐይቅ ላይ አሉታዊ ተፅእኖ እንደሌለው ከዚያ ይልቅ ውሐው ጉዳት በማያደርስ መልክ እንዲፈስ እንደሚያደርግ በመጋቢት ወር አስታውቀው ነበር ።

የተመድ የዓለም ባንክ እርዳታ በርካቶችን ማፈናቀሉ

በተለያዩ ሃገራት በዓለም ባንክ ድጋፍ የተካሄዱ አንዳንድ ፕሮጀክቶች በርካታ ሰዎችን ከመኖሪያቸው እንዳፈናቀሉ አንድ የምርመራ ጋዜጠኞች ቡድን አጋለጠ ። ዓለም ዓቀፉ የምርመራ ጋዜጠኞች ቡድን በእንግሊዘኛው ምህፃር ICIJ ከሚዲያ አጋሮቹ  ጋር ባካሄደው ክትትልና ጥናት በዓለም ባንክ የገንዘብ ድጋፍ በሚንቀሳቀሱ በፕሮጀክቶች ሰበብ 3.4 ሚሊዮን ህዝቦች ከመኖሪያ ቤቶቻቸው እና ከመሪታቸው መፈናቀላቸውን ትናንት ይፋ ባደረገው ዘገባው አስታውቋል ። እንደ ዘገባው ከተፈናቃዮቹ አብዛኛዎቹ በአፍሪቃ የውሐና የኤሌክትሪክ አቅርቦቶችን ለማሻሻል አለያም በአጠቃላይ መሠረተ ልማቶችን ለማስፋፋት በሚካሄዱ ፕሮጀክቶች ምንክንያት ነው የተፈናቀሉት ። የሰብዓዊ መብት ተሟጋቾች ከችግሩ መንስኤ አንዱ ባንኩ በተጨባጭ የሚፈፀመውን ሳይረዳ ተበዳሪዎች የሚሰጡትን መረጃ ብቻ መቀበሉ ነው ይላሉ ። የሰብዓዊ መብት ተሟጋቹ የአምነስቲ ኢንተርናሽናል የንግድና የሰብዓዊ መብት ጉዳዮች ተንታኝ አሌሳንድራ ማሲ ይህን ከሚሉት ተንታኞች አንዷ ናቸው ።

«አበዳሪዎች በሚሰጡት መረጃ ይተማመናሉ። ባንኩ ተበዳሪው የሚሰጠውን መረጃ በትክክል አያጣራም።እናም ግልጽ ነው ተበዳሪው ብድር ማግኘት ስለሚፈልግ ፣ ያሉትን መሠረታዊ ችግሮች እና በህብረተሰቡም ላይ የሚያስከትሏቸውን አሉታዊ ተፅእኖዎች ባለማሳወቅ የኤኮኖሚ ጥቅም ያገኝበታል።»

 ለዚሁ የምርመራ ዘገባ ከ50 በላይ ጋዜጠኞች አንድ ዓመት ለሚጠጋ ጊዜ በ21 ሃገራት መረጃዎችን ሲሰበስቡ ነበር ። የቡድኑ ጋዜጠኞች በአንዳንድ ሁኔታዎች የዓለም ባንክ ድጋፍ የሚሰጣቸው ፕሮጀክቶች በሚገኙበት አካባቢ የሚኖሩ ማህበረሰቦች በሙሉ በግዳጅ በጥድፍያና በኃይል ጭምር እንዲነሱ መደረጉን አጋልጧል ።የ ICIJ ዘጋቢዎች  በኢትዮጵያ  የዓለም ባንክ ለሃገሪቱ ጤናና ትምህርት እንዲውል ከሰጠው ሁለት ቢሊዮን ዶላር ውስጥ በሚሊዮኖች የሚቆጠር ዶላር፣ ሁለት ሚሊዮን ሰዎችን በኃይል ለማፈናቀል ዘመቻ መዋሉን እንደደረሱበት አስታውቀዋል ።በጋዜጠኖቹ ዘገባ መሰረት በዓለም ባንክ  ድጋፍ በሚካሄዱ ፕሮጀክቶች ምክንያት በኢትዮጵያ  ከ95 ሺህ  በላይ ሰዎች ተፈናቅለዋል ።ይህ እርምጃም እንደ ጋዜጠኞቹ ቡድን ስር የሰደደ ድህነትን ለመቀነስ ያለመውን የዓለም ባንክን ዓላማ የሚፃረር ነው ።

ጄኔቫ /ጆሃንስበርግ በውጭ ዜጎች ላይ ጥቃቱ ቀጥሏል

በደቡብ አፍሪቃ በውጭ ዜጎች ላይ የሚፈፀመው ጥቃትና ዝርፊያ እንዳሳሰበው የተመድ አስታወቀ ። ከዛሬ ሁለት ሳምንት ወዲህ በደርባን የቀጠለው ይኽው ጥቃት ወደ ጆሃንስበርግም ተሸጋግሯል ።ትናንት ሌሊቱን በማዕከላዊ ጆሃንስበርግ የውጭ ዜጎች ንብረት የሆኑ ሱቆችና መኪናዎች ታቅጠለዋል ።የውጭ ዜጎች የደቡብ አፍሪቃ ፖሊስ ጥበቃ አያደርግልንም ሲሉ ያማርራሉ ። የተመ የስደተኞች ጉዳይ ከፍተኛ ኮሚሽን በምህፃሩ UNHCR ባለፉት ሶስት ሳምንታት  በደቡብ አፍሪቃ በውጭ ዜጎች ላይ በተፈፀመው ጥቃት አራት ሰዎች መገደላቸውንና ከ5ሺህ በላይ የሚሆኑ ደግሞ መፈናቀላቸውን ገልጿል ። ድርጅቱ እንዳለው ጥቃት የሚፈፀምባቸው በጦርነትና በሰብዓዊ መብት ረገጣ ምክንያት ወደ ሃገሪቱ የተሰደዱና ተገን የጠየቁ ሰዎች ናቸው ። ባለፉት ሁለት ሳምንታት ጥቃት የሶማሌዎች የኢትዮጵያውያንና የማላውያን ቤቶች እና ሱቆች ግንባር ቀደም ሰለባ ነበሩ ። አሁንም በቀጠለው ጥቃት ለህይወታቸው የሰጉ አንዳንድ የውጭ ዜጎች ከመኖሪያቸው ሸሽተው በአንዳንድ ማዕከላት መጠለላቸው ተዘግቧል ። ማላዊ ዜጎቿን ለማስወጣት አውቶብሶች አዘጋጅታለች ። ኬንያና ሌሎች የአፍሪቃ ሃገራት  የጥቃት ስጋት ያለባቸውን ዜጎቻቸውን እንደሚያስወጡ  አስታውቀዋል ።

ዋሽንግተን በኤቦላ የተጠቁ ሃገራት የእርዳታ ጥሪ

በኤቦላ ወረርሽኝ ክፉኛ ለተጎዱት 3 የምዕራብ አፍሪቃ ሃገራት መልሶ መቋቋሚያ በሁለተኛው የዓለም ጦርነት ማግስት አሜሪካን ለጀርመንና ለምዕራብ አውሮፓ የዘረጋችው ዓይነት የማርሻል እቅድ እርዳታ ተጠየቀ ። የላይቤሪያ ፕሬዝዳንት ኤለን ጆንሰን ሰርሊፍ በጎርጎሮሳዊ 2014 ዓም በኤቦላ የተጠቁት ጊኒ፣ ላይቤሪያ ና ሴራልዮን ኤኮኖሚያቸውን መልሶ ለመገንባትና በሽታውንም ለመከላከል ስምንት ቢሊዮን ዶላር የማርሻል ፕላን እርዳታ እንዲሰጣቸው ዛሬ ጠይቀዋል ። ሰርሊፍ ገንዘቡ ብዙ ቢሆንም ሶስቱ ሃገራት  ከኤቦላ ወረርሽኝ እንዲያገግሙ ወሳኝ እንደሆነ ዋሽንግተን ዩናይትድ ስቴትስ ውስጥ የዓለም የገንዘብ ና የእርዳታ ድርጅቶች መሪዎች በተገኙበት ስብሰባ ላይ አስታውቀዋል ። የማርሻል እቅድ ከጦርነት በኋላ የመጣ እቅድ መሆኑን ያስታወሱት  ሰርሊፍ ኤቦላም ለሶስቱ ሃገራት ልክ እንደ ጦርነት እንደነበረ አስረድተዋል ።

ኮሎኝ የጀርመንዊንግስ አደጋ ሰለባዎች መታሰቢያ በኮሎኝ

ከሶስት ሳምንት በፊት የጀርመንዊንግስ አውሮፕላን ፈረንሳይ ውስጥ በአልፕስ ተራራ ሲከሰከስ ህይወታቸው ያለፈው መንገደኞችና የአውሮፕላኑ ሠራተኞች ዛሬ በኮለኙ ታዋቂ ካቴድራል በተካሄደ ስነ ስርዓት ታሰቡ ። በስነ ስርዓቱ ላይ በካቴድራሉ ዐውደ ምህረቱ በሟቾቹ ቁጥር  150 ሻማዎች እንዲበሩ ተደርጓል ። በመታሰቢያው ላይ የተገኙት የጀርመን ፕሬዝዳንት ዮአሂም ጋውክ አደጋው ያደረሰው ስነ ልቦናዊ ጉዳት ከፍተኛ እንደሆነ ተናግረዋል ።

«ሁላችንም እጅግ ያስደነገጠን የድርጊቱ እንቆቅልሽ ነው። የጥፋቱ ድርጊት ለምን በማለት በአንክሮ እንድንጠይቅ ያደርገናል ። ብዙ ሰዎች በአንድ በተናጠል ድርጊቱን በፈፀመ ሰው ውሳኔ ለህልፈተ ህይወት የተዳረጉበት ሁኔታ መልስ የማይገኝለት ጥያቄ ነው ። ሃዘኑና ሰቆቃው በጥልቅ ህሊናን የሚጎዳ የሰውን ልጅ ነፍስ የሚያውክ ነው ። »

በዚሁ የመታሰቢያ ስርዓት ላይ ከተካፈሉት መካከል ፣ የሟቾቹ ቤተሰቦች ፣ የጀርመን መራሂተ መንግስት አንጌላ ሜርክል፣የስፓኝ የሃገር ውስጥ ጉዳይ ሚኒስትር ዮርግ ፈርናንዴዝ ድያዝ ፣የፈረንሳይ የትራንስፖርት ሚኒስትር አልያን ቪዳሊ እና የጀርመን ዊንግስ ሃላፊ ቶማስ ቪንክልማን ይገኙበታል ።

መጋቢት 15፣  2007 ዓም በደረሰው በዚህ አደጋ አንድሪያስ ሉቢትስ የተባለው ረዳት አብራሪ አውሮፕላኑን ሆን ብሎ እንዲከሰከስ በማድረግ ተጠርጥሯል ።

ለንደን ኃይሌ በታላቁ የማንቼስተር ሩጫ ይወዳደራል

ታዋቂው የዓለም ሻምፕዮን አትሌት ኃይሌ ገብረ ሥላሴ የፊታችን ግንቦት 2 2007 ዓም በሚካሄደው በብሪታኒያው የማንቼስተር የ10 ሺህ ሜትር የጎዳና ላይ ሩጫ እንደሚካፈል የውድድሩ አዘጋጆች አስታወቁ ። 37 የዓለም ክብረ ወሰኖች ባለቤት የ41 ዓመቱ አትሌት ኃይሌ ታላቁን የማንቼስተር የ10ሺህ ሜትር የጎዳና ላይ ሩጫ ለስድስተኛጊዜ ለማሸነፍ ማቀዱን አዘጋጆቹ ተናግረዋል ። በጎርጎሮሳዊው 1996 እና በ2 ሺህ በኦሎምፒክ የ10 ሺህ ሜትር ሩጫ ውድድር ሻምፕዮን ኃይሌ የማንቸስተሩን የ10ሺህ ሜትር የሩጫ ውድድር 5 ጊዜ ማለትም በጎርጎሮሳዊው 2005 ፣2009፣2010፣ 2011 ና 2012 በአሸናፊነት አጠናቋል ። ኃይሌ ስለ ግንቦቱ ሩጫ በሰጠው መግለጫ ማንቼስተር ከዓለማችን ከተሞች ለውድድር የምትመቸው ከተማ መሆንዋን አስታውቋል ።የውድድሩ ድባብ ህዝቡ እና ዝግጅቱ እጹብ ድንቅ ነው ሲልም አወድሷል ።

HM AA