1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

ዜና | 26.05.2015 | 17:11

ኬንያ፤ የአሸባብ ጥቃት

የሶማሊያው ደፈጣ ተዋጊ ቡድን አሸባብ  ኬንያ ውስጥ በሶማሊያ ድንበር አቅራቢያ ትናንት ምሽት ጥቃት ከጣለ በኋላ የኬንያ ፖሊስ ከቡድኑ ጋር ከባድ ውጊያ ማካሄዱ ተዘገበ ። አሸባብ በሰጠው መግለጫ ቢያንስ 20 ፖሊሶች መግደሉን አስታውቋል ። ሆኖም የኬንያ ባለሥልጣናት እንዳሉት የተገደለው አንድ መኮንን ብቻ ሲሆን ሌሎች 4 ደግሞ ቆስለዋል ። ቀደም ሲል ፖሊስ 13 ባልደረቦቹ የደረሱበት እንዳልታወቀ ተናግሮ ነበር ።  ጥቃቱ የደረሰው ከሃገሪቱ በስተሰሜን ምስራቅ ሶማሊያ ድንበር አቅራቢያ በሚገኘው በጋሪሳ ከተማ ነው። ሌሎች ፖሊሶችም አማፂያኑ መሬት በቀበሩት ፈንጅ መገደላቸው ተመልክቷል። አማፂው ቡድን ለአመታት በሶማሊያ እና በጎረቤት ኬንያ የሽብር ጥቃቶች ሲያደርስ ቆይቷል። ቡድኑ ባለፈው ሚያዚያ  ጋሪሳ በሚገኝ ዩንቨርስቲ ላይ ባደረሰው ጥቃት 148 ሰዎች ተገድለዋል ።ከመካከላቸው አራቱ አማፂያን ነበሩ።ጋሪሳ ኬንያን ከሶማልያ ጋር ከሚያዋስነው ድንበር 200 ኪሎሜትር ያህል ርቃ የምትገኝ ከተማ ናት።

ናይጄሪያ፤ ግጭቶች እና የአጥፍቶ ጠፊዎች ቁጥር መጨመር

ናይጄርያ ውስጥ በቤኑ ግዛት ተጠርጣሪ የፉላኒ ከፊል አርብቶ አደር በበርካታ መንደሮች ላይ ባደረሱት ጥቃት ቢያንስ 96 ሰዎች መገደላቸውን የሀገሪቱ የፖሊስ ቃል አቀባይ እና የጦር ኃይል ዛሬ አስታወቀ። ከፊል አርብቶ አደር በሆነው የፉላኒ ማህበረሰብ እና በአካባቢው በእርሻና በከብት እርባታ በሚተዳደረው ማህበረሰብ መካከል በሚነሱ ግጭቶች በየአመቱ በመቶ የሚቆጠሩ ሰዎች ህይወት ይጠፋል። የአሁኑ ግድያዎች የተፈፀሙት ሰሞኑን በአምስት መንደሮች በተነሱ ግጭቶች መሆኑ ተገልጿል።

በሌላ ዜና

ናይጄሪያ ውስጥ በፅንፈኛው አማፂ ቡድን ስር የአጥፍቶ ጠፊ የቦምብ ፍንዳታዎች የሚካሂዱ ልጃገረዶችና ሴቶች ቁጥር በአሳሳቢ ሁኔታ እያደገ መሄዱ ተገለፀ ። የተባበሩት መንግስታት የህፃናት መርጃ ድርጅት /unicef/  ዛሬ እንዳስታወቀው ከቦኮሃራም የአጥፍቶ ጠፊ ጥቃት ከሶስት አራተኛው በላይ እድሜያቸው ከ 7- 17 በሆኑ ልጃ ገረዶች ነው የሚፈፀመው ። በዚሁ ሰበብ ህፃናት አደጋ ላይ መውደቃቸውን ድርጅቱ አስታውቋል ። ህፃናቱም ጥቃቱን ሆን ብለው ሳይሆን በአዋቂዎች ተመክረው እንደሚፈፅሙ በናይጄሪያ የUNICEF ተጠሪ ጂን ጎህ አስረድተዋል።በናይጄሪያ ባለፉት አምስት ወራት ብቻ 27 የአጥፍቶ ጠፊ ጥቃቶች ደርሰዋል ። በጠቅላላው ያለፈው ዓመት የደረሱት የአጥፍቶ ጠፊ ጥቃቶች ቁጥር 26 መሆኑ ተገልጿል።   

ሞዛምቢክ፤ የሀገሪቱ ዝሆኖች ቁጥር በግማሽ መቀነሱ

መቀመጫውን ዩናይትድ ስቴትስ ያደረገው የዱር አራዊቶች ጥበቃ ማህበረሰብ በምህፃሩ WCS ዛሬ እንዳስታወቀው፤ ባለፉት አምስት አመታት ብቻ ሞዛምቢክ ውስጥ ካሉት ዝሆኖች ግማሽ ያህሉ ለጥርሳቸው ሲባል ተገድለዋል።

የሞዛምቢክ መንግሥት ጥናት እንደሚያመላክተው የዝሆኖቹ ቁጥር በ48 በመቶ ቀንሷል ። ከ 20 000 በላይ የነበሩት ዝሆኖች ቁጥር በአሁን ሰዓት ወደ 10, 300 ዝቅ እንዳለ ይገመታል። በዝሆን ብዛት በታደለችው ሀገር ቁጥራቸው በፍጥነት ሊቀንስ የቻለበት ምክንያት ሰዎች ዝሆኖቹን ሆን ብለው በመግደላቸው መሆኑን ዘገባው አትቷል። እጅግ በርካታ ቁጥር ያላቸው ዝሆኖች የተገደሉት በሀገሪቱ ሰሜናማ ክፍል በሚገኘው የኒሳ ብሔራዊ ፓርክ ነው።

በመላ አፍሪቃ በአመት 30 000 የሚጠጉ ዝሆኖች በህገ ወጥ መንገድ ለጥርሳቸው ሲባል እንደሚገደሉ ይገመታል። ቻይና እና ሌሎች የእስያ ሀገሮች ዋና ተረካቢ ሀገሮች ናቸው።እንደ ድንበር የለሽ የዝሆኖች ተቋም ከሆነ በአጠቃላይ በአፍሪቃ ያሉት የዝሆኖች ቁጥር 470 000 ቢደርስ ነው።

ዩናይትድ ስቴትስ፤ የፈረንሳይ አይሮፕላን እና የቦምብ ማስፈራሪያ

አንድ የፈረንሳይ የህዝብ ማመላለሻ የ«ኤር ፍራንስ» አይሮፕላን በዩናይትድ ስቴትስ የጦር ጄቶች ተከቦ ትናንት  ኒው ዮርክ አረፈ። አውሮፕላኑ በጦር ጀቶች ተከቦ እንዲርፍ የተገደደው አንድ ማንነቱ ያልታወቀ የስልክ ጥሪ ቢያንስ አራት አትላንቲክን አቋርጠው ወደ ዩናይትድ ስቴትስ የሚበሩ አይሮፕላኖች ጥቃት እንደሚያደርሱ በማስፈራራቱ መሆኑን የዩናይትድ ስቴትስ ፖሊስ ገለጿል። ከፓሪስ የተነሳው አይሮፕላኑ ኒው ዮርክ እንዳረፈም መንገደኞቹ እና ሻንጣቸው ተፈትሾ ምንም አይነት ፈንጅም ይሁን ጎጂ ነገር አለመገኘቱን ፖሊስ ጨምሮ ገልጿል። የጦር ጄቶቹ የተከታተሉት ይህንኑ የኤር ፍራንስ አይሮፕላን ብቻ ነበር።

ኢራቅ፤ ከ አይ ኤስ አማፂያን አንባር አውራጃን ልታስለቅቅ ነው

ኢራቅ ራሱን እስላማዊ መንግሥት ሲል በሚጠራው አማፂ ቡድን ስር የምትገኘውን አንባር አውራጃ መልሳ ለመቆጣጠር የማጥቃት ርምጃ መውሰድ ጀመረች። ከሀገሪቱ ጦር ጎን ተሰልፎ አማፂ ቡድኑን የሚዋጋው የሱኒ ተፋላሚ ኃይል አንድ ቃል አቀባይ እንዳስታወቁት የኢራቅ ተጣማሪዎች በሶስት በኩል አድርገው  የአውራጃው ዋና ከተማ የሆነችው ወደ ራማዲን እየተጠጉ ነው። የዩናይትድ ስቴትስ መከላከያ ሚኒስትር አሽተን ካርተር ኢራቃውያን የውጊያ ፍላጎት አያሳዩም ካሉ በኋላ በኢራቅ ጦር ላይ በርካታ ጥያቄዎችን አስነስቶ ነበር። ከጀርመን የሳይንስ እና የፖለቲካ ጥናት ተቋም ጊዶ ሽታይንበርግ፤ ዛሬ ለዶይቸ ቬለ እንደገለጹት ምክንያቱ የጦር አዛዦቹ የሚሾሙበት መንገድ ነው ።

ድምፅ 1

« ወታደሮቹ በሙስና ለተዘፈቀ መንግሥት እና አመራር ለመዋጋት ፍላጎት የላቸውም።  የጦር አዛዦቹ በችሎታ ሳይሆን የሚሾሙት ፤ ለጠቅላይ ሚኒስትሩ እና ለፖለቲካው ባላቸው ቅርበት ነው።  ይህም የኢራቅ ጦርን ዋጋ ቢስ ያደርገዋል።»

ይሁንና የዩናይትድ ስቴትስ ምክትል ፕሬዚዳንት ጆ ባይድን የኢራቅ ጦር ኃይል ወታደሮችን ለጥንካሬያቸው አወድሰዋቸዋል።  አማፂ ቡድኑ ከአንድ ሳምንት ገደማ በፊት ነበር ፤ ራማዲን የተቆጣጠረው፤ ከጥቂት ቀናት በኋላም ሶርያ ውስጥ ስልታዊ የሆነችውን  የፓልምያራ ከተማን ተቆጣጥሯል።

በሌላ ዜና

የሶርያ አየር ኃይል ቢያንስ 140 ራሱን እስላማዊ መንግሥት ሲል የሚጠራው ቡድን አባላትን መግደሉን የሀገሪቱ ዜና ምንጭ «ሳና» ዛሬ አስታወቀ። ግድያው የተፈፀመው ሰሜን ሶርያ ውስጥ በአማፂ ቡድን ስር በነበረ ወታደራዊ ጦር ሰፈር ላይ በተፈፀመ የአየር ጥቃት ነው።

ቻይና፤ የአረጋውያን መጦርያ ተቃጥሎ ቢያንስ 38 ሞቱ

ማዕከላዊ ቻይና ውስጥ አንድ የአረጋውያን መጦርያ ተቃጥሎ ቢያንስ 38 ሰዎች መሞታቸውን ባለስልጣናት ገለፁ። የቻይና የመገናኛ ብዙኃን ሺንዋ እንደዘገበው  ሰኞ ማምሻውን በተነሳው ቃጠሎ ቢያንስ ስድስት ሰዎች ቆስለዋል። የሟች አስክሬኖች ከፍተኛ ቃጠሎ ስለደረሰባቸውም ለመለየት ከባድ እንደነበረ ተገልጿል። እንደ አይን እማኞች ገለፃ አደጋው በደረሰበት ወቅት ከ 160 በላይ አረጋውያን በመጦሪያ ቤቱ ውስጥ ነበሩ።  የቃጠሎው መንስኤ ባይረጋገጥም የሚጠረጠረው ቃጠሎውን አንድ የኮረንቲ ገመድ ማስነሳቱ ነው። ፖሊስ 12 የመጦሪያ ቤቱ ሰራተኞችን ለምርመራ በቁጥጥር ስር አውሏል።

LA/HM