مشرق وسطیٰ امن مذاکرات، ’میرکل کے دورہ اسرائیل کا بنیادی ایجنڈا‘

جرمن چانسلر انگیلا میرکل نے اپنے دورہ اسرائیل کے دوران بروز پیر 24 فروری یروشلم میں اسرائیلی وزیر اعظم بینجمن نیتن یاہو سے ملاقات سے قبل کہا کہ وہ مشرق وسطیٰ امن مذاکرات میں پیشرفت کی خواہاں ہیں۔ جرمن چانسلر میرکل نے کہا کہ وہ اپنی نئی کابینہ کے زیادہ تر ارکان کے ساتھ اسرائیل کا دورہ اس لیے کر رہی ہیں تاکہ اس یہودی ریاست کے ساتھ دوستی کا مظاہرہ کیا جا سکے۔ یورپ میں جرمنی کو اسرائیل کا ایک اہم حلیف ملک تصور کیا جاتا ہے۔ تاہم اسرائیل کی طرف سے مغربی اردن میں یہودی آباد کاری کی وجہ سے ان دونوں ممالک میں بھی کچھ اختلافات پیدا ہو چکے ہیں۔

پیر کی شب یروشلم میں اسرائیلی وزیر اعظم بینجمن نیتن یاہو کے ساتھ ایک پریس کانفرنس کے دوران میرکل کا کہنا تھا کہ جرمنی گزشتہ پانچ دہائیوں سے اسرائیل کے مستقبل کو محفوظ بنانے کے لیے اس یہودی ریاست کے شانہ بشانہ کام کر رہا ہے۔ مجوزہ آزاد فلسطینی ریاست کے قیام کی طرف اشارہ کرتے ہوئے انہوں نے زور دیا کہ دو ریاستی حل اسرائیل کی سلامتی کی ضمانت ہے۔

اس موقع پر اسرائیلی وزیر اعظم کا کہنا تھا کہ جرمن چانسلر کے دو روزہ دورہ اسرائیل کے دوران امریکی ثالثی میں جاری فلسطینی امن مذاکرات کے علاوہ ایران کے جوہری عزائم پر تفصیل سے گفتگو کی جائے گی۔ ان کا کہنا تھا کہ وہ میرکل اور ان کی کابینہ کے ممبران سے ملاقاتوں کے دوران ایران کو جوہری ہتھیاروں کے حصول کے قابل بننے سے روکنے کے لیے کئی منصوبوں کو زیر بحث لائیں گے۔ ان کا کہنا تھا کہ ایران کے پاس جوہری ہتھیار آ جانا، دنیا کی سلامتی کے لیے خطرہ ہیں۔

اسرائیلی وزیر اعظم نیتن یاہو نے اس امر کی طرف بھی اشارہ کیا کہ وہ اس دوران فلسطینیوں کے ساتھ امن عمل کو آگے بڑھانے کے لیے متعدد منصوبہ جات پر گفتگو کریں گے۔ ان کا اصرار تھا، ’’ اسرائیلی عوام امن چاہتے ہیں۔ وہ حقیقی امن چاہتے ہیں۔ وہ ایسا امن چاہتے ہیں، جس کے نتیجے میں تنازعات ختم ہو جائیں اور فلسطینی یہودی ریاست کے وجود کو تسلیم کر لیں۔‘‘

دوسری طرف جرمن وزیر خارجہ فرانک والٹر شٹائن مائر نے مغربی اردن میں نئے مکانات کی تعمیر کو کڑی تنقید کا نشانہ بناتے ہوئے کہا ہے کہ یہ اسرائیلی پالیسی مشرق وسطیٰ امن عمل کی راہ میں ایک بڑی رکاوٹ ہے۔ انہوں نے کہا کہ اسرائیلی حکام کے ساتھ دو روزہ ملاقاتوں کے دوران یہ معاملہ اٹھایا جائے گا۔ اسرائیل روانہ ہونے سے قبل میڈرڈ میں صحافیوں سے گفتگو کرتے ہوئے شٹائن مائر کا کہنا تھا کہ وہ دیکھیں گے کہ اسرائیلی فلسطینی مذاکرات کے دوران کہاں کہاں رکاوٹیں ہیں اور انہیں کیسے دور کیا جا سکتا ہے۔

اسرائیل کا مؤقف ہے کہ یہودی آباد کاری کا مسئلہ بھی امن مذاکرات کے دوران حل کیا جانا چاہیے۔ اسرائیلی وزیر اعظم بارہا کہہ چکے ہیں کہ نئے مکانات کی تعمیر کا معاملہ امن عمل کے لیے رکاوٹ نہیں ہے بلکہ یہ مذاکرات کے ذریعے حل کیا جا سکتا ہے۔ ان کا اصرار ہے کہ فلسطینی اسرائیل کو بطور ایک یہودی ریاست تسلیم کریں۔