طالبان کے ساتھ بات چیت جامع مرحلے میں پہنچنے کو ہے، چودھری نثار

پاکستانی حکومت کا یہ اعلان طالبان کے دھڑوں میں امن بات چیت کے حوالے سے پائی جانے والی پھوٹ پر ہونے والی لڑائی کے بعد سامنے آیا ہے۔ طالبان کے دھڑوں میں لڑائی کے نتیجے میں ساٹھ سے زائد افراد ہلاک ہو گئے تھے جبکہ اس شدت پسند گروہ کی جانب سے اعلان کردہ سیز فائر کی مدت بھی ہفتے کو ختم ہو چکی ہے۔

خبر رساں ادارے اے ایف پی کے مطابق تحریکِ طالبان پاکستان (ٹی ٹی پی) نے گزشتہ ماہ فائر بندی کا اعلان کیا تھا جس کے بعد چھ اپریل کو اس میں مزید چھ روز کے لیے توسیع کی گئی تھی۔ ہفتے کو یہ مدت ختم ہونے پر طالبان نے مزید توسیع کا اعلان نہیں کیا لیکن کوئی پرتشدد کارروائی بھی سامنے نہیں آئی ہے۔

چودھری نثار علی خان نے اتوار کو بات چیت کے جامع مرحلے کا اعلان کرتے ہوئے بتایا کہ فریقین باقاعدہ ایجنڈے پیش کریں گے۔ انہوں نے نے دارالحکومت اسلام آباد میں صحافیوں سے بات چیت میں کہا: ’’آئندہ ملاقات سے باقاعدہ جامع بات چیت شروع ہو جائے گی اور اُمید کی جا سکتی ہے کہ یہ بات چیت آئندہ چند دِنوں میں شروع ہو جائے گی۔‘‘

انہوں نے صحافیوں کو مزید کہا: ’’آئندہ میٹنگ میں آپ کو حکومت اور دوسری جانب کے ایجنڈے کے بارے میں معلومات مل جائیں گے۔ اس ملاقات میں دونوں جانب سے جامع ایجنڈا پیش کیا جائے گا۔‘‘

وزیر داخلہ نے کہا کہ مذاکرات کے عمل کو آگے بڑھانے کے لیے حکومت طالبان کے تیس سے زائد غیرلڑاکا قیدی رہا کرنے جا رہی ہے۔ انہوں نے بتایا: ’’ہم مزید تیرہ تک قیدی رہا کریں گے۔ ان کی رہائی کے بعد، مجموعی طور پر رہا کیے گئے غیرلڑاکا قیدیوں کی تعداد تیس سے زیادہ ہو جائے گی۔‘‘

خیال رہے کہ طالبان کے مذاکرات کاروں نے حکومت سے آٹھ سو قیدیوں کی رہائی کا مطالبہ کر رکھا ہے، جنہیں وہ بے قصور قرار دیتے ہیں۔

یہ امر بھی اہم ہے کہ پاکستانی وزیر اعظم نواز شریف نے گزشتہ برس کے انتخابات کے دوران امن مذاکرات کے نکتے کو ہی اپنی انتخابی مہم کا حصہ بنایا تھا۔ خبررساں ادارے اے ایف پی کے مطابق طالبان کی جانب سے ملک بھر میں شریعت کے نفاذ اور قبائلی علاقوں سے سکیورٹی فورسز کے انخلاء کے مطالبوں کی وجہ سے تجزیہ کار اس مذاکراتی عمل سے زیادہ اُمیدیں نہیں رکھتے۔