شام میں بم دھماکے، 50 سے زیادہ ہلاک

برطانیہ میں قائم سیریئن آبزرویٹری فار ہیومن رائٹس نے مقامی آبادی کے حوالے سے بتایا ہے کہ دو کار بم دھماکے آج مقامی وقت کے مطابق صبح ساڑھے چھ بجے ہوئے۔ جرمانا وہ علاقہ ہے، جہاں حکومت کے حامی ملیشیا ارکان نے اس علاقے کو باغیوں سے بچانے کے لیےمسلح گروپ تشکیل دے رکھے ہیں۔

سرکاری نیوز ایجنسی سانا نے بتایا ہے:’’دہشت گردوں نے دمشق صوبے میں جرمانا نامی قصبے کے مرکزی چوک میں بھاری مقدار میں بارود سے لدی دو کاریں دھماکے سے اڑا دیں، جس سے بہت سے شہری ہلاک اور زخمی ہو گئے جبکہ رہائشی عمارات اور دکانوں کو نقصان پہنچا۔‘‘

دو قریبی ہسپتالوں کے ذرائع کا کہنا ہے کہ وہاں کم از کم 20 لاشیں لائی گئی ہیں۔ ان ذرائع نے یہ معلومات شناخت خفیہ رکھنے کی شرط پر بتائیں کیونکہ اُنہیں میڈیا کے ساتھ بات چیت کی اجازت نہیں ہے۔

اگرچہ سرکاری ٹیلی وژن نے وزارت داخلہ کے حوالے سے مرنے والوں کی تعداد 34 بتائی ہے تاہم عینی شاہدوں کا کہنا یہ ہے کہ جرمانا کے دھماکوں میں مرنے والوں کی تعداد 50 سے بھی تجاوز کر گئی ہے۔

سانا نیوز ایجنسی کے مطابق ان کار بم دھماکوں کے ساتھ ساتھ جرمانا ہی میں دو اور بم بھی پھٹے، جن میں کوئی شخص ہلاک نہیں ہوا۔ جرمانا میں ان دھماکوں کے بعد شہریوں میں خوف و ہراس پھیل گیا۔ 28 اگست کے بعد سے جرمانا میں یہ چوتھا بم حملہ ہے۔ 29 اکتوبر کو اس قصبے میں ایک کار بم دھماکے میں گیارہ افراد ہلاک ہو گئے تھے۔

آج بدھ ہی کے روز جنگی طیاروں نے پندرہ منٹ کے اندر اندر شام کے شمال مغربی علاقے میں مراۃ النعمان کے مقام پر پانچ فضائی حملے کیے۔ اس شہر کے جنوب میں سرکاری دستوں اور باغیوں کے درمیان جھڑپیں ہو رہی ہیں۔ شامی اپوزیشن کے مطابق سرکاری دستوں نے حمص اور دیگر مقامات کو بھی گولہ باری کا نشانہ بنایا ہے۔

سیریئن آبزرویٹری فار ہیومن رائٹس کے مطابق ایک روز پہلے منگل کو شام بھر میں تشدد کے مختلف واقعات میں کم از کم 132 افراد ہلاک ہو گئے، جن میں 58 شہری، 38 باغی اور 36 سرکاری فوجی شامل ہیں۔ ایک اندازے کے مطابق گزشتہ سال مارچ میں شروع ہونے والی حکومت مخالف کارروائیوں میں اب تک 40 ہزار سے زیادہ افراد مارے جا چکے ہیں۔

(aa/ah(afp