جرمن پارلیمنٹ نے بلیو کارڈ کی منظوری دے دی

بلیو کارڈ دراصل وَرک پرمٹ ہے جو یورپی یونین کے تمام ملکوں میں فعال ہو گا ۔ اس کے تحت انتہائی اعلیٰ تربیت یافتہ افراد خطے میں روزگار کے مواقع تلاش کر سکتے ہیں۔

یہ کارڈ امریکا میں جاری کیے جانے والے گرین کارڈ کی طرز پر بنایا جائے گا اور اس کے تحت ورکروں کو ملک میں غیرمعینہ مدت تک قیام کی اجازت ہو گی۔ 

بلیو کارڈ کے نفاذ کے بعد جرمنی میں ملازمت کے خواہاں اعلیٰ تربیت یافتہ افراد کو کم رکاوٹوں کا سامنا کرنا پڑے گا۔

جرمن پارلیمنٹ کی جانب سے منظور کردہ یہ قانون یورپین کمیشن کی ہدایات کے مطابق ہے، جو 2009ء میں سامنے آئی تھیں۔ ان کے تحت یورپی یونین کے غیر رکن ملکوں سے تعلق رکھنے والے اسکلڈ ورکروں کے لیے خطے میں رہائش کے لیے وہی ضوابط ہونے چاہیئں جو امریکا میں غیرملکیوں کے لیے ہیں۔

بلیو کارڈ کے حصول کے خواہشمند افراد کے لیے کالج ڈگری کے ساتھ یہ بھی لازمی قرار دیا گیا ہے کہ وہ سالانہ کم از کم پینتالیس ہزار یورو کی آمدنی رکھتے ہوں۔ اس سے پہلے یہ حد چھیاسٹھ ہزار یورو تھی۔ اب انجینئروں اور وہ شعبے جن میں تربیت یافتہ افراد کی قلت ہے، کے لیے یہ حد پینتیس ہزار یورو کی جا رہی ہے۔

ان شرائط کو پورا کرنے والے امیدواروں کو عارضی رہائش کا اجازت نامہ دیا جائے گا، جو جرمنی میں ملازمت کے تین سال بعد مستقل کر دیا جائے گا۔

بلیو کارڈ رکھنے والے کسی بھی فرد کے شریکِ حیات کو بھی ملازمت کرنے کی اجازت ہو گی اور اسے جرمن زبان کا کوئی امتحان بھی پاس نہیں کرنا ہو گا۔

یورپی یونین کے خطے سے باہر کے وہ طلبا جو جرمن یونیورسٹیوں سے گریجویشن کرتے ہیں، انہیں تعلیم مکمل کرنے کے بعد جرمنی میں ڈیڑھ برس تک قیام کی اجازت ہو گی۔ اس عرصے میں وہ اپنی تعلیم کے مطابق ملازمت تلاش کر سکتے ہیں۔ اس میں کامیابی کی صورت میں دو سال تک ملازمت کرنے کے بعد انہیں بھی بلیو کارڈ دیا جائے گا۔

اس حوالے سے جرمن پارلیمنٹ میں جمعے کو ہونے والی ووٹنگ میں سوشل ڈیموکریٹس نے حصہ نہیں لیا۔ انہوں نے سالانہ آمدنی کے لیے پینتیس ہزار یورو کی شرح کو بہت کم قرار دیا ہے۔ گرین پارٹی نے بھی اس ووٹنگ میں حصہ نہیں لیا۔

ng/ah (dpa))