بلوچستان: ہتھیار ڈالنے والوں کے لیے مراعات

قبا ئلی عمائدین کی موجودگی میں ہتھیار ڈال کر حکومت کی عمل داری تسلیم کرنے والے ان جنگجوؤں میں سے اکثریت کا تعلق بگٹی قبیلے کے مختلف زیلی شاخوں سے ہے۔ ان فراریوں میں بی آر اے کے سات اہم کمانڈرز بنگل خان بگٹی، دھنی بخش شمبھانی، جنگی ہان، منظور کرمانی، رندک کوڈر اور دیگر شامل ہیں۔ یہ افراد ماضی میں پاکستان مخالف سرگرمیوں میں ملوث رہے ہیں۔ تاہم ہتھیار پھینکنے کے بعد حکومت نے اب ان کے لیے عام معافی کا اعلان کیا ہے۔

بلوچستان کے سینیئر وزیر عبدالرحیم زیارت وال کا کہنا ہے کہ بہتر اورمخلصانہ پالیسیوں کی وجہ سے بھٹکے ہوئے لوگ پہاڑوں سے واپس آرہے ہیں اور فیڈریشن کی دلچسپی سے صوبے میں ان حالات میں مزید بہتری واقع ہو گی۔ ڈی ڈبلیو سے گفتگو کرتے ہوئے ان کا مزید کہنا تھا: ’’یہ وفاق کی ذمہ داری ہے کہ وہ اپنی اکائیوں کو اسی طرح مطمئین کرنے کے لیے اقدامات کرتا رہے۔ صوبائی حکومت کی یہ اولین کوشش ہے کہ ہم ان باغی گروپوں کو اپنی مثبت پالیسی سے آگاہ کریں اور انہیں اس بات پر قائل کر سکیں کہ وہ مسلح جدوجہد چھوڑ دیں اورصوبے میں پر امن جدوجہد کی راہ اپنائیں۔‘‘

اطلاعات کے مطابق بلوچستان میں باغی گروپوں کے افراد ماضی میں بھی سینکڑوں کی تعداد میں ہتھیار ڈال چکے ہیں۔ تاہم یہ کالعدم مسلح تنظیمں ان کی تردید کرتی آئی ہیں۔ بلوچ قوم پرست جماعت بی این پی مینگل کے سربراہ سردار اختر جان مینگل کا مؤقف بھی اس سے مختلف نہیں ہے: ’’میرے خیال میں حکومت نے روز اول سے بلوچستان کے مسئلے پر کبھی توجہ نہیں دی ہے اور بلوچستان ان کے اقتدار کی سیڑھی کا حصہ نہیں رہا ہے۔ وہ صرف اپنا دور گزار رہی ہے تاکہ ان کی حکومت پر کوئی دھبہ نہ لگے۔ جس طرح دیگر لوگوں کو انہوں نے ہتھیار اٹھانے پر مجبور کیا ہے مجھے تو لگتا ہے کہ وہ ہماری جماعت کوبھی اس حد تک دھکیلے گی کہ اس کے کارکن بھی ہتھیار اٹھانے کا سہارا لیں۔ ماضی میں بھی نا انصافی کی وجہ سے لوگوں نے ہتھیار اٹھائے۔‘‘

محکمہ داخلہ کے ذرائع کے مطابق حکومت اور بیرون ملک مقیم ناراض بلوچ رہنماؤں کے ساتھ رابطوں میں بھی اہم پیش رفت ہوئی ہے اور بعض رہنماؤں کی جانب سے صوبے میں ان کے حق خود اداریت کے حوالے سے چند اہم مطالبات بھی پیش کیے گئے ہیں جن پر مرکزی حکومت غور کر رہی ہے۔

یہاں یہ امر بھی قابل ذکر ہے کہ حکومت بلوچستان نے مسلح جدوجہد کی راہ ترک کر کے محب وطن بننے کا عہد کرنے والے فراریوں کو عام معافی دینے کے ساتھ ساتھ ان کے لیے ایک خصوصی پیکج کا بھی اعلان کیا ہے جن میں مختلف مراعات اوران کے علاقوں کی ترقی کے لیے اقدمات شامل ہیں۔