امریکا میں ’گن کلچر‘ کے موضوع پر صدارتی مہم کے دوران خاموشی

امریکی شہر ارورا کے سنیما گھر پرشوٹنگ کے اس واقعے کے بعد صدر ڈیموکریٹ باراک اوباما اور ری پبلکن پارٹی کی طرف سے میدان میں اتارے گئے صدارتی امیدوار مٹ رومنی نے گزشتہ روز اپنی اپنی صدارتی انتخابی مہم کو مؤخر کر دیا۔ صدر اوباما نے سوگ کا اعلان کرتے ہوئے سرکاری دفاتر پر پرچم سر نگوں رکھنے کا حکم بھی جاری کیا ہے۔ ہلاک ہونے والوں کی تعزیت کرتے ہوئے نہ تو صدر اوباما نے اور نہ ہی مٹ رومنی نے امریکا میں’گن کلچر‘ پر زبان کھولی۔

امریکا میں ’گن کلچر‘ ایک ایسا موضوع ہے، جس پر اس صدارتی مہم کے دوران مکمل خاموشی دیکھنے میں آ رہی ہے۔ نیویارک شہر سے تعلق رکھنے والے اسلحہ پر کنٹرول کے ایڈووکیٹ مائیکل بلومبرگ کا کہنا ہے، ’’ تعزیتی پیغامات بھلے معلوم ہوتے ہیں لیکن میرا خیال ہے کہ اب وقت آ گیا ہے کہ یہ دونوں حضرات، جو امریکا کے صدر بننے کے خواہشمند ہیں، اب ہمیں بتا ہی دیں کہ یہ گن کلچر کے حوالے سے کیا اقدامات کرنا چاہتے ہیں‘‘۔ امریکا میں گن کلچر کے حوالے سے مختلف آرا پائی جاتی ہیں۔

ڈینور کے قریب جہاں شوٹنگ کا واقعہ رونما ہوا ہے، وہاں سے جیمز ہولمز نامی ایک مشتبہ شخص کو گرفتار کیا گیا ہے۔ پولیس نے بتایا ہے کہ اس سے آتشیں ہتھیار بھی برآمد ہوئے ہیں۔ امریکی ذرائع ابلاغ کے مطابق چوبیس سالہ مشتبہ شخص نے یہ ہتھیار قانونی طور پر حاصل کیے تھے۔

گریجویٹ اسٹوڈنٹ ہولمز کو متوقع طور پر پیر کے دن عدالت کے سامنے پیش کیا جائے گا۔ بتایا گیا ہے کہ ہنگامی کال موصول ہونے کے 90 سکینڈ میں ہی پولیس جائے وقوعہ پہنچ گئی تھی، جہاں مشتبہ شخص نے بغیر کسی مزاحمت کے خود کو پولیس کے حوالے کر دیا۔

جس سنیما گھر پر حملہ ہوا ہے، وہاں بیٹ مین سیریز کی نئی فلم The Dark Knight Rises کا پریمیئر شو دکھایا جا رہا تھا۔ اس واقعہ کے بعد امریکی ریاست کولوراڈو میں ایسے تمام تھیٹرز میں سیکورٹی سخت کر دی گئی ہے، جہاں یہ فلم نمائش کے لیے پیش کی جا رہی ہے۔

اس فلم کے تخلیق کار ادارے وارنر برادرز نے بھی اس حملے کی مذمت کرتے ہوئے ہلاک شدگان کے لواحقین کے ساتھ تعزیت کا اظہار کیا ہے۔ ادارے کی طرف سے جاری کردہ ایک بیان کے مطابق پیرس میں اس فلم کا پریمیئر شو منسوخ کر دیا گیا ہے۔

ab/ai (Reuters)