آزاد کرو یا سزائے موت دے دو، بریوک

بریوک نے قید کی سزا کو مضحکہ خیر قرار دیتے ہوئے کہا کہ سزائے موت کو بحال کیا جائے۔ واضح رہے کہ ناورے میں آخری بار سزائے موت دوسری عالمی جنگ میں نازیوں کا ساتھ دینے والے مجرموں کی دی گئی تھی تاہم اب ناروے سمیت یورپ بھر میں سزائے موت پر پابندی عائد ہے۔

سماعت کے تیسرے روز استغاثہ نے بریوک سے ایسے حقائق اگلوانے کی پوری تگ و دو کی جن سے معلوم ہو سکے کہ آیا یورپ میں وہ مسلم مخالف گروہ موجود ہے، جس سے تعلق کا بریوک دعویٰ کرتا رہا ہے۔ بریوک نے استغاثہ کے دلائل کو مسترد کرتے ہوئے بتایا کہ ایسا گروہ واقعی موجود ہے تاہم اس نے اعتراف کیا کہ اس نے گزشتہ برس 22 جولائی کو اوسلو میں بم دھماکے اور قریبی جزیرے پر سوشل ڈیموکریٹک پارٹی کے نوجوانوں کے کیمپ پر فائرنگ سے قبل اپنے 15 سو صفحات کے ’منشور‘ میں اس نیٹ ورک کو بڑھا چڑھا کر پیش کیا۔ اس نے بتایا کہ یہ گروپ دیگر عام تنظیموں کی طرح کوئی باقاعدہ منظم گروہ نہیں ہے کیونکہ اس کا کوئی قائد نہیں اور یہ کہ اس نیٹ ورک سے منسلک افراد انفرادی سطح پر کارروائیاں کرتے ہیں۔

بدھ کی کارروائی کے بعد وکلائے استغاثہ نے صحافیوں کو بتایا کہ وہ اس بات پر یقین نہیں رکھتے کہ ایسا کوئی گروہ یورپ میں موجود ہے۔ وکلاء کے مطابق بریوک کی یہ بات بھی تسلیم نہیں کی جا سکتی کہ اس نے اس گروہ کے اراکین سے لائبیریا، برطانیہ اور بالٹک ممالک میں ملاقاتیں کیں۔

ناروے میں زمانہ امن میں ہونے والے دہشت گردی کے اس سب سے خونریز واقعے میں ملوث بریوک کے بارے میں عدالت کو اب یہ طے کرنا ہے کہ آیا اسے 21 برس یا عمر قید کی سزا سنائی جائے یا اس کی ذہنی صحت کو دیکھتے ہوئے اسے پاگل خانے بھیجا جائے۔

عدالت بریوک کے بارے میں یہ بھی طے کر سکتی ہے کہ اگر وہ ذہنی طور پر درست حالت میں ہے، تو اسے اس وقت تک قید میں رکھا جائے، جب تک وہ معاشرے کے لیے کسی طرح کا خطرہ ثابت ہو سکتا ہے اور اگر وہ ذہنی طور پر خراب حالت میں پایا گیا تو اسے اس وقت تک نفسیاتی ہسپتال میں رکھا جائے گا، جب تک یہ اطمینان نہ ہو جائے کہ اب اس کی دماغی حالت درست ہے۔

واضح رہے کہ یورپ میں صرف بیلا روس وہ واحد ملک ہے، جہاں اب بھی سزائے موت دی جاتی ہے۔ 1996ء میں یورپی کونسل کا رکن بننے کے بعد روس نے اس سزا کے خاتمے کے لیے مہلت مانگی تھی تاہم ابھی تک اس نے یہ سزا قانونی طور پر ختم نہیں کی۔ ناروے نے موت کی سزا سن 1905ء میں ختم کر دی تھی، تاہم دوسری عالمی جنگ کے بعد اس سزا کو دوبارہ بحال کیا گیا، جو پھر سن 1979ء تک قائم رہی۔

at/aa (Reuters, AFP)