آتشیں اسلحے سے کیے جانے والے تشدد میں کمی کے لیے کوششیں کرنا ہوں گی، اوباما

جمعے کے روز پیش آنے والے اس واقعے میں ایک مسلح شخص نے کنیٹیکٹ ریاست کے علاقے نیو ٹاؤن میں سینڈی ہُک ایلیمنٹری اسکول میں فائرنگ کر کے 20 بچوں سمیت 26 افراد کو ہلاک کر دیا تھا اور بعد میں خود کو بھی گولی مار لی تھی۔ اس واقعے کے بعد اتوار کے روز نیوٹاؤن کا دورہ کرنے والے امریکی صدر اوباما نے اس تعزیتی تقریب سے خطاب کرتے ہوئے کہا کہ امریکا میں ایسے واقعات کی روک تھام کے لیے کیے جانے والے اقدامات ناکافی ہیں۔ انہوں نے اپیل کی کہ آئندہ ہفتوں میں ایسے موثر اقدامات کی ضرورت ہے، جن کے ذریعے آتشیں ہتھیاروں کو استعمال کرتے ہوئے شہریوں کی ہلاکت کے واقعات کو روکا جا سکے۔

’’ہم یہ مزید برداشت نہیں کر سکتے۔ ایسے سانحات کا روکا جانا ضروری ہے اور انہیں روکنے کے لیے ہمیں مختلف تبدیلیوں کی ضرورت ہے۔‘‘

انہوں نے مزید کہا، ’اگلے چند ہفتوں کے دوران میں اپنے دفتر کو حاصل تمام دستیاب طاقت استعمال کرتے ہوئے اپنے ہم وطن ساتھیوں کو ساتھ ملاتے ہوئے، قانون کے نفاذ سے لے کر ذہنی صحت سے وابستہ افراد، والدین اور اساتذہ کے ساتھ مل کر وہ تمام اقدامات کروں گا، جن کے ذریعے آئندہ اس طرح کے واقعات کو روکا جا سکے۔

انہوں نے واضح الفاظ میں کہا کہ امریکا کے پاس اب کوئی اور راستہ نہیں اور اس نوعیت کے واقعات کا بار بار وقوع پذیر ہونا ناقابل قبول ہے۔

اس موقع پر امریکی صدر نے اس واقعے میں ہلاک ہونے والے 20 بچوں اور چھ بالغ افراد کے نام بھی پڑھے۔ اس موقع پر تقریب میں شریک افراد کی آنکھیں نم ہو گئیں۔

واضح رہے کہ جمعے کے روز ایڈمز لانزا نامی 20 سالہ حملہ آور نے کنیٹیکٹ کے سنیڈی ہک اسکول میں داخل ہو کر خودکار رائفل اور ہینڈگنز کا استعمال کرتے ہوئے 20 بچوں سمیت 26 افراد کو ہلاکت کر دیا تھا۔ اس حملے میں ہلاک ہونے والے زیادہ تر بچوں کی عمریں چھ سے سات برس بتائی گئی ہیں۔ طبی ذرائع کا کہنا ہے کہ ہسپتال میں لائے گئے نو بچوں کی لاشوں کے معائنے سے پتا چلا ہے کہ ان میں سے ہر ایک کو تین تا گیارہ گولیاں لگیں۔

at/ng (Reuters)